Lok Sabha inthlanpui atan kar kalta lama Lunglei leh Kolasib district-in bul an tan tawh hnu ah district nawlpui chuan Thawhtanni atang khan home voting an kalpui.
Aizawl district-a Assembly segment 12 tan home voting ti mekin, April 10 thleng a awh ang. Election Commission of India (ECI) ruahman angin kum 85 chin chunglam leh Persons with Disabilities, vote thlak tura polling station pan tura harsatna neite tan mahni in lum atanga vote an thlak theihna’na tih a ni.
Aizawl district-ah tun inthlanpui atan home voting atan mi 874 chhinchhiah niin, an zinga 54 chu PwD an ni. Election duty-te team 22-a inthenin postal ballot hmangin vote hi thlak a ni.
Khawzawl district-ah pawh Thawhtanni atang khan kalpui tan a ni a. Assembly segment awmchhun Tuichang bialah eam 6-a inthenin, vote thlak dil mi 109 tan home voting hi April 8 & 9 ah an nei ang.
Siaha district-a Assembly segment pahniha home voting tih sak tur te hi Thawhtanni khan an chhuak a. Saiha bialah team 8 leh Palak bialah team 10 niin, kum upa 137 leh PwD 40 diltu an nei a ni.
Lawngtlai district Tuichawng leh Lawngtlai West bialah mobile polling team khat ve ve leh Lawngtlai East bialah teamhnih siam a ni a. Lawngtlai district pumah home voting dil 144 (senior citizen 140 leh PwD 4) an awm a ni.
Mamitah chuan vawiin, April 9 atang hian an fehchhuah tan dawn a. Assembly segment pathum awmah khaw 34-ah PwD 30 leh kum upa 82 in lama vote thlak tur an awm.
Home voting ti tura dil kum 85 chunglam leh PwD bakah essential service duty-te tan postal ballot hmanga vote thlak hun hawn tan a ni a. Thawhtanni khan Khawzawl district-ah 6, Siaha district-ah 14 leh Lawngtlai district-ah 7 ten vote an thlak a ni.
Home voting kalpui mek
