Hong Kong-ah ruah sur nasain nunphung tibuai

Hong Kong-ah ruah sur nasain nunphung tibuai
Hong Kong-ah ruah a sur tam ber tum thlengin sikul leh court khar a ni a, damdawi in pawh mumal lovin tuiin kawngpui a chim nasa hle.
Thawhlehni chawhnu dar 02:00 (India-a chhun dar 12:00) thleng khan ruah mm 350 chuang sur tawhin khawpuia khaw awm dan hriltute chuan kum 1884 hnua August thlaa ruah a sur tam ber ni a nih thu an sawi.
Ruahpui vanawnin kartawpah khan China chhim lam tuamin Guangdong province-ah mi panga an thi a, chhanchhuah hna thawktu pawh mi 1,300 an chet chhuah a ngai.
Video thehdarhah chuan awihah tui a luang nasa hle a, Hong Kong-a inchhawng sangte inkalpawhna atangin tui a far tluk tluk bawk.
Khawchin zirtute ruah hi nilenga sur turin an sawi lawk tawh a ni.
Ruah sur nasat tur thu hi ni riat lek chhunga vawi li tihchhuahna a ni tawh a, China-a sorkar news agency Xinhua chuan kum khat chhunga khaw awm dan avanga inralrinna tihchhuah tam ber tum a ni tawh tih an tar lang.
Thawhlehni zing atanga chhun lai thlengin tek pawh vawi 9,600 chuang a tla tawh niin Hong Kong-a weather observatory chuan a sawi.
Hong Kong-a damdawi in lian berah chuan ngalrek thleng tui dai tur a awm a, thuneitute chuan ruah sur nasa lutuk avang hian damdawi in tam tak khar a ni tih an sawi a. Car-te pawh tuiin a chim nasat avangin khawlaiah an tang bawk.
Chief Secretary for Administration Eric Chan chuan mipuite chu inringa awm tur leh hnathawk chhawr neite pawh an mi chhawrte himna ngaihtuah chunga an thawh hun pawh siam remsak turin an ti.
Thlawhna tumhmun hrang hrangte pawh buaiin Thawhlehnia thlawk tur thulh chu 20% vel a tling niin Flightmaster chuan a chhinchhiah a, lirtheite pawh khaw hmuh theih chin a tawi avangin tlan chak theih zawng bituk a ni bawk.
Mi thiamte chuan ruah sur nasa leh tui lian nasa tak tak hi sik leh sa inthlak nasa nghawng niin an ngai a, hei hi Hong Kong leh China pawh a tuar na zual tur zingah an dah a. Thihna leh hliam tawrhna a thlen bakah mi sang tam tak tui lian vangin an baihvai phah a, sum tam tak hloh phah a ni bawk.
Hong Kong hian kum khat chhungin ruah mm 2,200 vel dawng thin ang an ni a, a zahve vel hi June leh August inkara sur thin a ni.