Hormuz-a lawng beihnaah thawktu pahnih chin hre lo
Strait of Hormuz-a tuialhthei phur lawng beihnaah a thawk pahnih chin hriat lohvin an awm a, mi dang 23 chu chhanchhuah an nih thu Oman-in a sawi.
Oman-a Maritime Security Centre chuan Panama flag tarna, El Gaia hi Masandam peninsula hmar lam tuipui mel 1.3-a hlaah beih a nih avangin a engine room a kang a, Thawhlehni khan Omani lawng chawlhnaah hnuh thlen a ni tih a sawi.
Thawhtanni khan Iran-a Revolutionary Guards chuan lawng hi khuahkhirh leh kawng him lova a kal laiin chilpuah bomb a su puak a, a kang zui niin an sawi.
US sipaite erawh chuan Iranian-te sawi hi a dik lo tih an sawi a. Lawng hi Iranian missile-in thla hmasa khan a fuh a, kartawp khan drone-in a fuh leh niin an sawi ve thung.
UK Maritime Trade Operations Centre pawhin lawng hi Pathianni khaw var hmaa Strait of Hormuz-a a kal laiin engin emaw a fuh a, a kang zui niin a sawi ve bawk.
Tun thla tir khan Iran hian hetiang deuh bawk hian Filipino pahnih thihna thlenna, Saudi ta tuialhthei phur lawng lian chiin tui kawng pawimawh a kal laia a thil tawn chungchang a lo sawi tawh.
Revolutionary Guards chuan Sidr hian chilpuah bomb suin a kang niin an sawi a. Saudi thuneitute chuan Iran-in an kap niin a sawi a, maritime security firm-te pawhin Musandam-ah eng emaw hmanga beih niin an sawi bawk.
International Maritime Organization chuan US leh Israel tang dunin February thla tawpa Iran an beih atang khan Strait of Hormuz-ah lawng beihna ang chi thleng 79 awmin thawktu 22 vel an thi tawh niin a sawi.
Thawhlehni vek khan Iran-a Fars news agency chuan ‘hmelma drone’ hmangin a hma zanah Musandam hmarchhak lam km 80 vela hla, Iranian lawng chawlhna, Kargan bulah sangha manna lawng a fuh niin a tar lang bawk.
Revolutionary Guards nena inzawm, Fars hian Hormozgan province deputy governor chuan sangha mantu thenkhat an chin hriat a ni lo va, zawn hna thawh mek a ni tih a tar lang.
Ahnuah US Central Command (Centcom) thupuangtu chuan news website Axios hnenah an sipaiten tuipuia hman chi drone ruk tum lawng pahnih an kah chhiat thu a hrilh ve bawk.
Khawvela tuialhthei leh boruakalhthei phurh hmun ngaa thena hmun khat kalna, Strait of Hormuz hi Iran-in missile leh drone hmanga sumdawng lawngte a beih nasat avang leh US-in Iranian lawng chawlhna a dansak avangin khar deuh vek a ni.
US leh Iran hian June thla khan inrem lailawkna siamin strait pawh hawn a ni a; mahse, a hnu lawkah titawpin an inkap zui leh a, a hma ang bawkin lawng kal a buai zui lehnghal.
Iran hian tui kawng thunun hi a tum a, Iranian tuipuia kal lova chhim lam, Omani tuipuia kaltlang tum lawngte chu a bei thin a ni.
Hormuz-a lawng beihnaah thawktu pahnih chin hre lo
