Oman chuan Strait of Hormuz-a him taka a kal theihna tur kawng a awm theihna tura inbiaknain a tha lam a hawi tih a sawi a, hetih lai hian Tehran chuan eng inremna pawh siam se tuikawng pawimawh hawn nghalna tur a awm tihna a ni lo tih a sawi.
Lehlam lehlam hian Inrinni khan inbiaknain hma lam a pan tih an sawi a, tihfel hun tur erawh a la chiang lo thung . Omani foreign ministry chuan lawng beih thinin thil a tikhirh thei tih a sawi.
Iranian Foreign Minister Abbas Araghchi-a chuan an inbiakna hmawr an bawk thei hnai tih a sawi rualin strait hawn chu ‘thil sawi hmabak’ a la nih thu a sawi.
Tehran hian khawvela tuialhthei leh boruakalhthei phurh hmun ngaa then hmun khat kalna kawng hi February thla tawpa US leh Israel tang dunin an beih atangin a khar.
Tun hnaia Iran leh Oman inbia hian strait-a kalna kawng him a awm theih dan tur an ngaihtuah a, he kawng hi an mawhphurhna hnuai ve vea awm tur leh lawng a kal chhunzawm leh theihna tura an tih a ni.
Hetih lai hian Araghchi-a chuan a vaia hawng tur chuan an duh ang thil tam tak tihhlawhtlin a ngai tih a sawi a. Heng zingah hian June thlaa US nen indo titawp tura inremna an siam Washington-in a bawhchhia nia a sawia zangnadawmna an pek pawh a tel.
Memorandum of Understanding (MoU) tia an sawi inremna an siam hi rang taka tlu nghalin an inbei zui leh nghal a ni.
Iran-a security chief Mohammad Baqer Zolqadr-a pawhin news agency Tasnim hnenah Strait of Hormuz chu US-in an nunphung ‘an tihdik hma chuan’ hawn a ni dawn lo tih a sawi bawk.
US hian Iranian-te thil phut paruk a tihhlawhtlin a ngai niin a sawi a, heng zingah hian Iran a vau thin tihtawp te, Iranian lawng chawlhna a dan a tihtawp leh Iran-in a thil neih a hrensak chhuah te pawh a tel.
Red Sea-a Saudi Arabian lawng chawlhnate pawh Yemen-a Iran-in a thlawp Houthi-ten July 20 khan a khat tan bawk.
Kar kal ta tir lam khan US President Donald Trump-a chuan Iran nena inremna chu ‘a hnai hle tawh’ tih a sawi a, Vice-President JD Vance-a erawh chuan Inrinni khan an kal zel chuan an tifel thei dawn tih Fox News hnenah a la sawi chauh thung.
“A laiah kan la awm mek a, a la tawp rih lo,” a ti.
Vance-a hian February-a US-in an beih hmaa mi zat tho Gulf atangin ‘tuialhthei phurh chhuah a ni’ tih a sawi bawk a, chiang erawh a sawi lo.
Tehran leh Washington inkara mutan ber chu Iran-in strait kaltlang lawng atanga kal man (chhiah) lak a tum chungchang a ni a. Iranian thuneitu pakhat chuan lawngte hi an thil phurh man 5% leh 7% inkar lak an tum niin a sawi tih Reuters chuan a lo tar lang tawh.
Vance-a erawh chuan hei hi a nih loh thu a sawi thung.
Oman-in strait-a kal lawngte beih a sawi mek laiin Inrinni khan United Arab Emirates (UAE) chuan Iran-in tuialhthei phur lawng a bei niin a sawi.
Hormuz inbiaknain tha lam a pan – Oman; Strait hawn a ni dawn lo – Iran
