Horticulture Fair 2024, stall 202 awmna, ni thum chhung awh tur chu nimin khan horticulture minister-in Aijal Club Park-ah a hawng a. Horti Fair-ah hian pangpar stall 130, thei \iak stall 55, pot stall 9, lei\ha stall 3, theitui/pickle stall 5 a awm a ni.
He fair rawn hmanpuitu Thenzawl Horticulture College Dean chuan thei leh thlai thar sawngbawl (food processing) lamah Mizoramin potential a nei \ha tih thu a sawi a. He Fair stall 202 awmnaah hian food processing kaihhnawih (theitui/pickle etc.) erawh stall 5 chauh a awm thung. Potential kan neih \hatnaah hian hmalakna a chak lo hle thung tihna a ni thei awm e. Floriculture lamah erawh hmasawnna \ha tak a awm.
Fair hi kum 2012 a\anga kalpui tawh kha niin, Covid hripui avangin 2020 leh 2021-ah te kalpui theih a ni lova, kum 10 chhung Fair hi huaihawt a lo ni tawh tihna a ni.
Sawrkar thuchhuah a\anga kan hmuh danin, kum 10 chhunga sum lakluh zat belhkhawm hi Rs 3,19,40,606 a ni. Data a\anga a lan danah chuan, kum tina stall awm zat leh, fair neih chhunga sum lakluh zat a\anga chhutin, stall pakhatin \um khat fair neihah chawhrualin Rs 25,508 lalut \heuh ang an ni. Heta \ang hian 30% vel hlep tur anga chhutin, vawikhat Fair huaihawtah stall tin hian chawhrualin Rs 7652 an hlawh \heuh tihna a ni a; Fair hi a tlangpuiin ni thum chhung nei anga chhutin, an nikhat hlawh tur chu Rs 2550 tihna a ni bawk.
Fair huaihawtnaah hian a tlangpuiin stall neitute hi department lamin TA/DA te pawh an tumsak ve \hin niawm tak a ni a. Chutih lai chuan, an hah dan leh an inbuatsaihnaa an mimal insenso dan nena khaikhin chuan, Fair hi an hlawkpui lo tihna ni lovin, a ropui teh chiam lo a tih theih awm e.
Heta chhiarkawp hi ‘chawhrual’ a ni a, chawhrual loh chuan, mi \henkhat chuan an hlawh \ha hle ang a, \henkhat erawhin an \hatpui tehchiam lo thei bawk.
He chhiarkawp a\ang hian, horticulture lama Mizoramin hmalakna tur hmabak kan la ngahzia a lo lang thei a. Food processing lama potential nei \ha tak si hi, engatinge kan potential chu tun thlenga kan la hnemhnanpui phak si loh tih hi kan home-work tur chu a nih hmel ta a ni.
Mizorama eizawngtute innghahna zau ber chu horticulture leh agriculture hi a nih laiin, kuthnathawktute dawmkan kawngah hma kan sawn chak lo hle a, hei hi ram hruaitute hian mutmawh hnarmawha an neih a pawimawh takzet. Mizoram economy \hang chak tur chuan kuthnathawktute dinhmun chawikan a ngai a, kuthnathawktute dawmkang tur chuan ram hruaitu, politician kan tihte hi decision-maker an ni a, an duh leh duh loh te, an tum leh tum lohah te thil hi a innghat vek a. Ramin hma a sawn chak loh hian, ram hruaituten ram hmasawn an duh lo tihna a ni hial awm e.
Ram hruaitute hi an pawimawh, sawrkar hnathawk leh mipui an kaihhruai thiam chuan ramin hma a sawn lo thei lo; state dangah te pawh kan hmu mek \hin a nih hi. Kan ram hruaituten \an han la sauh sauh teh se.
Horticulture Fair Chhiarkawp
