Hot 100-ah Kendrick Lamar & SZA ‘Luther’ a la No.1
Billboard Hot 100 (singles) chart-ah ‘Luther’ dinhmun phet thei hla dang a la awm lo a, Teddy Swims ‘Lose Control’-in record a siam bawk e.
Kendrick Lamar leh SZA ‘Luther’ hi Billboard Hot 100-ah No.1 ni lehin, kar kua a No.1 tling ta. He single hi R&B legend mual liam taw Luther Vandross chawimawi nan a title hi an tih niin, a hla thuah pawh a hming hi an lam chhuak a, Lamar tan Hot 100-a a hla No.1 kai thei parukna a nih laiin SZA tan a pathumna a ni a, Lamar leh SZA tan he chart-a an hla No.1 ni rei thei ber a ni ve ve bawk.
Hetirual hian Teddy Swims hla hit, he chart-a No.1 te pawh lo ni zak zak tawh chu tunkar chart top 10-ah a la lang leh a, chart top 10-ah kar 58 a lang tling ta a, he chart top 10-a lang rei thei ber record a siam.
Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US stream (official audio leh official video), radio airplay leh sales data te chu tehna pawimawh a ni.
‘Luther’ hian kar khat chhungin radio airplay ngaithlatu maktaduai 67.5 nei lehin, stream maktaduai 25 leh sales 2,000 a la tling thei a, hei hi a kar kua nan chart-ah a No.1 pui leh ta a ni.
Chart No.1 hlui Lady Gaga leh Bruno Mars ‘Die With a Smile’ chu No.3 atangin No.2 a kai thar leh a, Drake ‘Nokia’ chu No.2 atangin No.3-ah a tawlh a, Chappell ‘Pink Pony Club’ No. 5 atangin No.4-ah a insawn a, Alex Warren hla, he chart top10-a lang thei hmasa ber ‘Ordinary’ chu No.7 atangin No.5-ah a insawn ve ta a, top 5 huanga a vawi khatna a ni. Chart No.1 hlui, he chart-a kar 19 No.1 thei Saboozey ‘A Bar Song (Tipsy)’ chu No.4 atangin No.6-ah a tawlh ta bawk.
Chart No.1 hlui Teddy Swims ‘Lose Control’ chu No.8 atangin No.7-ah a insawn a, he chart top 10-ah hian kar 58 a lang tling ta a, The Weeknd ‘Blinding Lights’ record lehpelin, chart top 10 a lang rei thei ber a ni ta a ni. ‘Lose Control’ hi top 10 chauh ni lo, Hot 100 chart-a a lan hrim hrim chu kar 87 a tling tawh a, Imagine Dragons ‘Radioactive’ nih rualin, Hot 100 chart-a lan reiah pathumna a ni mek bawk.
BigXthaPlug ‘All the Way’ featuring Bailey Zimmerman chu No.4 atangin No.8-ah a tawlh a, No.2 pawh lo ni tawh Benson Boone ‘Beautiful Things’ chu No.10 atangin No.9 a kai thar leh a, chart No.2 pawh lo ni tawh Morgan Wallen ‘I’m the Problem’ chu No.9 atangin No.10-ah a tawlh ve thung.
Hot 100 chart top 10-a lang rei zual te:
58, “Lose Control,” Teddy Swims
57, “Blinding Lights,” The Weeknd
48, “A Bar Song (Tipsy),” Shaboozey
44, “Stay,” The Kid LAROI & Justin Bieber
41, “Last Night,” Morgan Wallen
41, “Levitating,” Dua Lipa
39, “Circles,” Post Malone
38, “As It Was,” Harry Styles
37, “Heat Waves,” Glass Animals
37, “All I Want for Christmas Is You,” Mariah Carey
Hot 100-ah Kendrick Lamar & SZA ‘Luther’ a la No.1
