Mizoram thalaite eizawnna siamsaktu tur, ram ro tling ni thei tur, State Institute of Hotel Management (SIHM), Bung Bangla ami chu infrastructure mamawh tur chin din fel vek a nih tawh hnuah, a nihna tur angin state sawrkarin a kalpui zui leh thei si lo va. Sawrkar laipui lamin nghakhlel taka an lo thlirpui laiin, state sawrkar chuan ‘a tihngaihna kan hre lo’ tiin outsource dan tur a han dap ngial a, mahse beisei tur a awm chuang lo. Hemi chungchang chhui zuitu PAC chuan thil danga hman tangkai a rawt ta ringawt mai a ni.
He institution hi ram hmasawnna atana pawimawh tak mai a nih avangin sawrkar laipuia Ministry of Tourism pawhin a phurpui em em a, building mamawh, main building, boys & girls hostel sak nan cheng nuai 800 a theh chhuak a, engkim peihfel (post creation hnuah) a nih hnuah zirna hmanrua leh bungrua (equipments etc) lei nan cheng nuai 200 a dah hrang sa thlap bawk a; a vaiin cheng nuai 1000 sanctioned a ni. Kum 2009 atanga sak tan, 2013-a zawh fel, 2015-a Mizoram Tourism kuta hlan tak kha a ni.
Tourism department kuta a luh hnuah kum 10 zet a vei leh ta a, Mizoram sawrkarin staff chhawrna tur sum a ruahman thei ta si lova, outsource tuma hmalak ni mah se, beisei tur a chauh tak em avangin ‘thil dangah hmang mai rawh u’ tih a ni ta ringawt mai a ni!
A uiawm a, a zahthlak a, a mualphothlak bawk. State pakhat ve riang ruangin hetiang rotling (asset) tha lutuk tur a han pamtul ta ringawt mai hi chu a tlawmthlak lamah pawh a ngaih theih bawk awm e.
He institution hi puitling thei se chuan, tum khatah zirlai 100 tan hotel management degree course a zir theih ang a, zirlai 150 tan tourism diploma course a zir theih bawk ang. He Institute hi National Council For Hotel Management and Catering Technology vilna hnuaia enkawl tur a ni a, common entrance test hmangin degree course zirtur tan admission a tih theih dawn a ni. Hotel management zir tura harsa taka state dang pan ngai lova, mahni kawtkai atanga awlsam zawka zir zawh theihna tur, kum hnih khat dana zirlai za rual zir chhuah reng theihna tur a ni a, Mizoram asset tling tur a ni.
Tuna Super IAS coaching programme kalpui mekah hian hriat theih chinah kum hnih kaltaah khan mi 65 tan cheng nuai 250 vel sen ral a ni tawh a, tunah phei chuan nuai 500 vel chu a ral tawhin a rinawm. IAS nei tura investment kan la ngam ang tho hian, kum tin thalai 100 rual eizawnna siamsak theihna SIHM-ah hian eng vanga investment kalpui thei lo bik nge maw kan nih tak ni?
Hotel Management zirna tur puitling zo ta lo hi!…
