Budget Session neih mekah house leader-in Mizo hmeichhiain hnam dang a neih chuan Mizo a ni tawh dawn lo tiin a sawi a, khel zui a hlawh hle.
“Kan hmeichhiate’n hnam dang an neih khan an Mizona a tawp tawh dawn a ni,” tiin a sawi.
February ni 24 khan house leader hian The Mizo Marriage and Inheritance of Property (Amendment) Bill, 2026 a pu lut a, an pass a ni.
Bill pu luttu hian Mizo hmeichhiain hnam dang an neihin an Mizona a tawp dawn tiin a sawi a, titi a luah nghal, social media hmangtute’n an khel zui bawk. Inhnialna a chawk chhuak a, mi Mizoah a pian tawh chuan a paihsak theih loh tih ngaihdan neite’n an sawi zui lehzual niin a lang.
Mahse he bill-ah hian chutiang teh dawt chu a awm lo a, a bill pu luttu sawi ang hi a ni lo!
Budget Session neih mekah thil a thleng mawlh mawlh a, house leader-in titi a siam, social media lamah pawh a lar.
House leader hian February ni 24 vek khan Annual Report 2024-2025 of The Mizoram State Project Monitoring Committee a pharh (lay) a, mak ti fe fe an awm.
Mizoram State Project Monitoring Committee hi tuna sorkar ding lai din a ni a, mi dang sorkar leh se an din zui kher lo thei. Constitutional body a ni lo a, House committee a ni lo. Chuvangin House-ah an report pharh a ni hi mak ti an awm a ni.
“House-a pharh tur chi a ni lo, legislative material a ni lo hrim hrim. Member-te’n an dil avangin sorkar hian member-te pe ta se, a nih loh pawhin house leader hian house information atan kan han sem ve hrim hrim ang e tiin sem se, chutiang chuan ti se thuhran a ni. Tuna an tih dan hi chu house kalphung a ni lo,” speaker hlui pakhat chuan a ti.
February ni 23 khan house leader vek hian Sialkal Range Development Council Bill, 2026 a pu lut a, an pass lo! Select Committee kutah an dah. House leader bill put luh meuh an pass lo hian mak tih a hlawh a, sawi zui pawh a hlawh.
“House leader bill an pass lo kha thil mak a tling a, no confidence motion tluk thawthang a ni. Khatiang kha thil thleng turah ngaih a ni lo,” Minister hlui pakhat chuan a ti.
House leader-in titi a siam
