Mizoram Legislative Assembly 9-na thutkhawm hmasaber chu Ningani khan neih zawh a ni a. A tawp ni hian House member hlui boral ta sun niin, deputy speaker atan chuhtu awm loin Kolasib bialtu MLA Lalfamkima thlan a ni.
Assembly speaker Lalbiakzama sawmna angin House leader Lalduhoma chuan kumin November 14-a chatuan ram pan ta, MLA leh minister hlui Lalbiakzuala (67) h/o Lalhmingduhawmi, Chaltlang Ruam Veng chanchin a chhiar chhuak a. Hun engemawchen sawrkar hna a thawh hnu ah politics-ah lutin, 1993 MLA inthlanpuiah Congress (I) ticket-in Khawhai bial atanga thlantlin niin, hemi tuma Congress sawrkarah a tir lamah political assistant to chief minister leh political secretary to chief minister ah te dah a ni a, a hnu ah minister of state atan lakluh a ni tih a sawi.
An sun tak Lalbiakzuala chu mi kawm nuam tak, thian ngaina mi a ni, tiin, Lok Sabha MP a nih laiin Lalbiakzuala hi New Delhi Mizoram House-ah asst liaison officer a nih thu Lalduhoma hian sawiin, an chhungkaw pahnih an inpawh tha hle, tih te a sawi a ni.
Leader of opposition Lalchhandama Ralte bakah INC member C Ngunlianchunga leh BJP member Dr K Beichhua ten uina thu an sawi bawk.
Hemi hnu hian deputy speaker tur thlan a ni a. ZPM Legislature Party aiawhin Champhai North bialtu MLA H Ginzalala chuan deputy speaker atan MLA Lalfamkima a rawt a, South Tuipui bialtu MLA Jeje Lalpekhlua chuan a thlawp a, deputy speaker chuhtu dang an awm loh avangin speaker chuan Lalfakima hi he dinhmun luah tur hian a puang a ni.
Nilainia Assembly House-a larsap thusawi, lawmthu sawina motion putluh chu member-ten an sawi ho a. Lungrual taka pawm niin, ni thum awh Mizoram Legislative Assembly 9-na thutkhawm hmasaber chu Ningani hian a tawp zui a ni.
House member hlui sun Dy speaker-ah Famkima
