Mizoram Assembly House chhungah hmunphiahin sawi a hlawh a, sawihonain hun rei tak a awh a; House pawn lamah pawh sawizui a la hlawh zel.
February ni 21, 2024-a Assembly Session-a chief minister Lalduhoma’n ‘hmunphiah hring lei tur vai lo kal turte lo danga lo vau pawl an awm’ thu a sawi chungchangah nimin khan MNF thalaite chuan thuchhuah siamin, ‘hetianga dan kalha chea mi eizawnna ti buaitute hi chak taka chhuiin action a lak ngei hi MNF thalaite chuan kan beiseiin kan phut tlat a ni’ an ti a. Fake account pawh hun rei lote chhungin an chhui chhuak a, hei pawh hi chhui chhuak leh thuai rawh se, an ti a ni ber.
Hemi chungchang hi House zahawm tak chhungah chief minister hian a sawi chhuak a, House member-te a hrilh rual hian mipui pawh a hrilh tel nghal tihna a ni. Chief minister hian, hmunphiah hring lei tur vai lo kal turte lo danga lo vautute chu tute nge tih a sawi lang lem lo. Chutih rualin political party zinga tu ber emaw thiltiha puh theih a ni a, political party ni lem lo, ‘eng pawl emaw’ pawh an lo ni thei bawk. Tu ber nge tih sawi chhuah a nih loh avang hian, a lehlam (Opposition party) tan chuan mipuiin rinthua an ngaihbel theih avangin, sawi chiang tura MNF thalaiten an phut hi thil tihawm tak pawh a ni.
Hetianga a thawi tham deuha thusawi hian mipuiah ngaihdan dik lo emaw thlir dan dik lo emaw a tuh theih avangin ‘ni chu ni’ ‘ni lo chu ni lo’ tih hi kan kalpui a hun tawh hle.
House chhung meuha sawichhuah a nih tawh avang hian, kuthnathawktute thawhchhuah dehralna tura khawlhkham lo siamtu chu sawrkar hmelma, Mizoram leh mipuite hmelma, thil dik lo baksak a nih avang hian, House chhunga sawi chhuah mai hi duhtawk lova, pawn lama ‘action’ lak zui ngei hi dikna duh sawrkar tan chuan tihmakmawh chu a ni ta ber a ni.
House pawnah pawh hmunphiah bawk…
