Hralh hmaa sorkar app dah lawk vek turin phone siamtute thu pe

Hralh hmaa sorkar app dah lawk vek turin phone siamtute thu pe
India-a telecoms ministry-in smartphone siamtute chu an hralh chhuah hmain sorkarin a siam chhuah cyber security app dah sa vek turin a ti niin sorkar thupekah tar lang a ni a. Hetiang kalphung hi Apple chuan an duh ve loh avangin an inhnial mek nia sawi a ni.
India hi khawvela telephone hralh thatna ber zinga mi niin hmangtu tluklehdingawn 1.2 vel an awm a. Sorkarin app a siam hi January-a tihchhuah kha niin phone bo 7,00,000 hmuh let a ni tawh a, October-ah chauh bik pawh khan 50,000 an hmu let nia sawi a ni.
Sorkarin anti-spam mobile app a siam lo hmang duh lo tawh, Apple bakah Samsung, Vivo, Oppo leh Xiaomi te pawh he thupek thar hian a huam vek a ni.
Zirtawpnia sorkarin smartphone company liante hnena a mal theuhva lehkha an pekah ni 90 chhungin sorkarin Sanchar Saathi app a siam chu an mobile phone siam chhuahah dah sa vek turin an ti a, a hmangtuten an hman loh theih loh tura dah turin an ti bawk.
Tuna an hralh chhuah tawhah pawh software an tihchangtlun (update) hunah a awm theih nana ti turin a ti bawk.
Apple bikah hian kalphung an nei a, sorkar emaw, mi dang inrawlhna app bik emaw reng reng an smartphone-ah dah sa an phal lo nia sawi a ni.
Apple, Samsung leh Xiaomi atang hian Indian sorkar thupek hi chhan letna a la awm lo va, telecoms ministry pawhin thupek an chhuah bak engmah an la sawi lo bawk.
Industry pahnih chuan company-te nen a hmain sawihona an nei lawk lem lo tih an sawi a. Sorkarin thupek a siam chu scam leh network hman dik loh theihna tua IMEI tihdanglam leh thil danga dik lova hman theihna siam thei, telecom cyber security tiderthawng thei ni zawkin an sawi bawk.
Digit 14 emaw, 17 emaw handset tinin an neih thin, IMEI (International Mobile Equipment Identity) hi phone ruka tihdanglam a nih chuan network hmu thei lo tura tihna remchang ber a ni.
Indian sorkarin app a siamah hian biakna rinhlelhawm a awma report theihna te, IMEI finfiahna leh phone bote tihtawp (block) theihnate pawh a awm.
Tihchhuah a nih hnuah download maktaduai nga chuang awm tawhin phone bo maktaduai 3.7 chuang hmuh let a ni tawh a, inbiakpawhna maktaduai 30 chuang chu tihtawp a lo ni tawh bawk.
Sorkar chuan cyber hmanga invauna leh phone bo chhui chhuahna atana tangkai, police-in a chhuinaa pui thei tur leh dan lova zawrh awm thin danna tur niin an sawi.