Hreka vauna karah Iran-in nuclear ralthuam siam a tum lo tih sawi

Hreka vauna karah Iran-in nuclear ralthuam siam a tum lo tih sawi
Iran-in nuclear ralthuam siam a tum lo tih President Masoud Pezeshkian-a’n Nilainia UN General Assembly-ah a sawi a, a hma ni chiah khan ram hruaitu kalkhawmten Tehran-in ralthuam siam a tum a nih chuan hrek an duh thu an lo sawi tawh hlawm.
“He assembly-ah hian vawi khat dang ka sawi leh ang, Iran hian nuclear bomb siam a tum lo va, nuclear ralthuam neih a tum lo,” tiin Pezeshkian-a hian a sawi.
Britain, France leh Germany chuan Tehran hian kum 2015-a nuclear ralthuam siam lo tura an inremna a bawhchhia nia sawiin August 28 khan ni 30 chhung hun an pe a, an siam lo tih an finfiah loh chuan UN hrekna an kalpui lehah an vau.
European ram hausate hian Iran-in UN atanga endiktute an hmunhma a enfiahtir theih nan hun an pek hi thla ruk thleng pawh sei theih an ti a. Hetih chhung hian nuclear ralthuam hi an puah lo tih en fiah turin uranium an chhekte endik a ni dawn a, US nen pawh an inbia ang.
Pezeshkian-a hian European ram hausa, E3 tia an sawite thil tih dan chu ‘dan lo’ tia sawiin US pawh zah lo niin a puh.
US, Europe-a an thawhpui leh Israel chuan Tehran hi nuclear programme nei leh ralthuam siam theihna tur kawlah an ngai a. Iran erawh chuan an programme hi a him chin zel tih a sawi ve thung thin.
Hrek tura vau a nih reng karah khawi lam lam pawhin inbiak an la inpeih reng tih an sawi ve ve a. Hetih lai hian E3 hian Iran-a an puithiam roreltu chuan inbe turin thil pawm theih loh a nei niin a sawi.
Iranian Supreme Leader Ayatollah Ali Khamenei-a hi an rama ram dang dawr leh nuclear programme-a thu tak niin invauna kara US dawr a duh lo nia sawi a ni.
Tehran leh E3 hi September 27 thlenga an inrem thei lo a nih chuan Iran lakah UN hrekna hman leh a ni dawn a, kum 2018-a President Donald Trump-a’n a hrek tawh avanga an ram eibar hniam mek karah na taka tuar thei an ni.
June thlaa US leh Israel tangrualin Iranian nuclear hmunte an beih hnuah Iran-a parliament chuan International Atomic Energy Agency (IAEA) an thawhpuina an titawp a. September 9 khan inrem lehin an nuclear hmunte hi an endik leh thei dawn a ni.