Lehkha chhiar taima, lehkha chhiar nuam ti mi a ni a, zirlai leh lehkhabu dang a hmuh ang ang chhiar thin mi a ni. Covid-19 hrilen lai te pawh khan lehkha a chhiar nasa. Tunah chuan MCS officer a ni dawn ta.
MPSC buatsaih combined exam result a chhuak a, a chung bera mi Lalnunpuia Renthlei, HD Renthlei fapa, Republic Veng hi “Ka hmuh ang ang hi ka chhiar mai,” ti thei khawpa lehkha chhiar taima a ni a, “Lehkha chhiar hi ka hobby a ni,” a ti.
Mihring nuna thil thlengte hi a lo dawngsawng thiam leh thiam lo a awm theih a, a hmachhawn thiam leh thiam lo kar a zau thei khawp. Thil lawmawm lo lam te pawh thenkhat chuan an hmang tangkai a, Covid-19 hrileng te meuh pawh kha hmang tangkai an awm. Nunpuia tan pawh hian Covid-19 hrileng kha lehkha chhiarna hun tha a ni daih.
2021-ah a graduate a, Covid-19 vanga hun engemaw chen class kal thei lo zinga mi, online-a zir a ni. Mahse Mizoram exam sangah pakhatna a ni thei tho.
“Lehkha kha ka chhiar nasa a… a hun lai kha chuan lehkha chhiar bak kha tih tur dang vak kha a awm lo a, lehkha chhiarna hun tha a ni mai a,” tiin Covid-19 hrilen lai, class an kal theih loh lai chanchin a sawi a, “Lockdown lai vel te kha chuan lehkha chhiar kha tih tur awm chhun a ni mai a, ka chhiar ngat ngat mai,” a ti.
A naupan lai atanga lehkha chhiar taima a ni a, “Lehkha chhiar hi ka tan phurrit a ni lo, nuam ka ti,” a ti. “Krismas-ah pawh kawr thar aiin lehkhabu ka duh zawk thin,” a ti a, lehkhabu lei nuam a tih thu sawiin, “A remchan dan ang angin ka lei a, ka lei ang ang hi ka chhiar mai,” a ti. Lehkhabu chi hrang hrang a chhiar a, literature-a tui, poetry pawh ngaihnawm ti taka chhiar thin a ni.
A lehkhabu chhiar hi a hlawkpui thu a sawi a, “Zirlaiah leh exam-naah ka hlawkpui a, thil dangah pawh kawng hrang hrangin ka hlawkpui,” a ti. “Min khalh kaltu a ni,” tiin lehkhabu chhiar a hlawkpui dan hi a sawi.
A rualpui dangte ang bawkin social media a khawih thin a, youtube leh IG a khawih ber. Social media pawh hi a hlawkpui a, “Zirna leh hriatna lama min pui thei tur lam hi ka follow nasa a, ka hlawkpui khawp mai,” a ti. Social media-a a thil hmuh leh hriatte hian a pui tih a sawi a, documentary film a en thinte a hlawkpui thu a sawi bawk.
“Coaching ka kal ve si lo a, social media hi ka coaching ve a ni,” a ti.
2022-ah khan combined exam hi a lo bei tawh a, a tling lo. RTI hmangin a chhanna a dil a, essay-ah serial number a lo pek loh avangin mark a hmu lo. A danga a mark hmuh atanga chhutin serial number hi lo pe se chu a tling ang tih a rin theih. Mahse na a ti lo a, “Ui chu ka tui a, mahse ka la na lo. Ka tihsual kha ka hre tlat a,” a ti.
Tuna result chhuak hi nikuma exam result a ni a, prelims hi nikum June-ah an exam. 2022 kum tawp lamah khan a ril a pawp a, damdawi inah emergency-a zai a ni. 2023 April-ah an zai leh a, chutiang chung chuan prelims chu a exam a, a duh angin a inbuatsaih thei lo.
“Ka thutin a zual tlat a, mu chungin ka zir thiam si lo a,” a ti a, “Tihngaihna a awm si lo a, ka thu tawp mai. Na ti chungin thu chungin ka zir,” a ti a, colostomy bag leh diaper hmang chunga a zir thu leh a inbuatsaih a har thu te a sawi.
“Ka confi lo,” a ti a, “Tlin pawh ka inring lo. Mahse beiseina chu ka nei ve tho,” a ti a, “Pakhatna nih phei hi chu Pathian hnenah ka la dil chhin lo,” a ti.
“Pathianin kan ta tura a dah hi chu mihringte hian kan pumpelh lo a nih hi ka ti,” tiin a result hi Pathian zar a ni tiin a sawi.
Hrilen lai pawha lehkha chhiar kha a chung berah
