District civil supply officer Siaha M Vanlalduata chuan March 20 chawhnu khan hrilhlawk loin Siaha khawpui eirawngbawlna gas-a chawmtu (agent) Mizofed Gas Agency Meisatla a tlawh a, Mizofed manager Joseph Lallungmuana leh a thawhpuiten an lo dawngsawng.
DCSO chuan, tunlai khawvel boruak inlumletin eirawngbawlna gas lakluh leh semchhuahah Siaha khawpui chhung nghawng a nei em tih hrechiang tura tlawh a ni tih a sawi a. Mizoram manager chuan tun dinhmunah eirawngbawlna gas a thleng tha a, kawnga thang mek pawh a awm, tiin, tunlai hmasawnnain a ken tel social media-in chiaina thlen lo se, mipui tan eirawngbawlna gas hi sem dan phung pangngaiin an sem chhuak reng a, chutiang tur chuan stock dinhmun a tha tih pawh an hre ngei ang, tiin a sawi. Siaha khawpuiah home delivery an kalpui tawh a, tunhnaiah thu lengvak a tam hma kha chuan eirawngbawlna gas la turin mipui (consumer) lam an intur hial zawk tih a sawi a ni.
Tunhnaia mipui harsatna tawh ber chu, delivery authentication code (DAC) a ni tih Mizofed hotu hian sawiin, miss call-na tura call hnuah sms thleng tur a thlen theih loh chang a tam a, DAC tel lo chuan gas pekchhuah theih a ni si lo tih a sawi. Gas card neitu (holder) mobile number atang chauha gas hi book/ miss call theih ani tih mipuiin an hriat thar leh thaa a hriat thu a sawi bawk.
DCSO hian Siaha-a filling station pahnih – Immanuel Filling Station Meisavaih East leh J Rama Filling Station College Vaih tlawh nghalin, tun dinhmunah petrol leh diesel dinhmun a that thu thawktuten an lo hrilh.
Hrilhlawk loin gas agency tlawh
