Hrin dan pangngaiin kum 66 miin a fa 10-na hring

Hrin dan pangngaiin kum 66 miin a fa 10-na hring
Germany-a nu pakhat, kum 66 mi chuan tun lai thiamna, in-viro fertilization (IVF) hmang miah lovin khuarel pangngaiin a fa 10-na a hring.
Alexandra Hildebrandt-i fa hrin 10-na hi March 19 khan Charite Hospital-ah hringin a hmingah Philipp an sa a. A pian hlim hian pound sarih leh ounce 13 a ni.
Hildebrandt-i hi Berlin khawpuia Checkpoint Charlie-ah Wall Museum neitu leh enkawltu a ni a. A fa hmasa ber a hrin chu kum 1970 chho kha ni daih tawhin a fa pariat dang a neih chhunzawm a, kum 50 a nih thleng heng a fa upa lam pakua hi a hring.
“Chhungkaw hung tak nih hi a nuam satliah rihngawt lo va, a pawimawh ber chu naupangte tha taka enkawl hi a ni,” tiin Hildebrandt-i hian TODAY hnenah a sawi.
Kum 46 mi ni tawh, Svetlana-i chu a upa ber niin Artiom, 36; phir Elisabeth & Maximilian, 12; Alexandra, 10; Leopold, 8; Anna, 7; Maria, 4 leh Katharina, 2, te a nei tawh a ni.
Hildebrandt- enkawltu ber, Dr Wolfgang Henrich-a chuan nau pai leh hrinah harsatna tehchiam a la nei hran lo niin a sawi a. “A hrisel thain a taksa a la chak a, a rilru lam a paukhauh bawk a, Hildebrandt-i hian tha takin nau a hring mai a ni,” a ti.
Kum upa, ‘pitar’ tia sawi mai theih rual a nih thlenga nau tha taka a la hrin theih chhan an zawh chuan Hildebrandt-i hian sawi tur a hre vak bik lo va. Ni tin a che taksa fit taka a la awm chu a nih a rin thu a sawi a, eng emaw siam chawp intihchakna engmah a hmang lo tih a sawi bawk.
“Thil hrisel hlir ka ei a, ni tin darkar khat tui ka hleuh ziah a, darkar hnih vel ka tlan a, mei ka zu lo va, zu ka in lo awk a, chu chu a ni mai. A bak thil danglam ka ti lo,” a ti.
Fa neih tam chu thil tul nia a hriat thu leh nu leh pa tam takin an duh lo chu tha a ti lo va, inzirtir a ngai hle nia a hriat thu a sawi a ni.
Tun hi kum upain nau a hrin vawi khatna a ni lo va. November, 2023 khan Uganda-ah kum 70 mi, Safina Namukwaya-i chuan IVF hmangin phir a lo hring tawh a, kum 2020-ah hmeichhia a lo hring tawh bawk.