Hriselna lamah TKP thawhpui rel
Healthy Lunglei District Campaign kalpui mek hnuaia Mizoram thalai Kristian Pawl (MtKP) nen tangDUNA hriselna chungchang beihpui thlak tur (pilot project) chu Thawhlehni khan district bawrhsap Navneet Mann chuan a hawng.
Healthy Lunglei District Campaign hi kumin June 12 atanga kalpui tan a ni a, hmun hrang hrangah hriselna dinhmun endik leh inzirtirna kalpui tawh niin, November 21 thleng khan mi 3251 hriselna dinhmun endik a ni tawh a, thisen sang hriat chhuah thar 162 leh zunthlum hmuh thar 75 an awm a; thisensang hriat tawh sa 199 leh zunthlum case hlui 106 endik nawn an ni bawk.
MTKP secretary Rev F Zorinkhuma chuan thalaite hriselna atana hma an lak mek dan a sawi a. Kumin June 19 khan ram pumah ‘Hriselna atan Tlan’ an huaihawt a; MTKP hnuaia bial leh unit hrang hrangah hriselna lam hawiin hma an la chho mek. Tuna hriselna lam hawia sawrkar leh kohhran thawh hona tur chu phurawm a tih thu a sawi a ni.
District thuneitute leh MTKP tangduna hmalakna atan hian pastor bial TKP pathum – Bazarveng, Rahsiveng leh Theiriat bial leh an hnuaia unit 14 thlan an ni. Zingkara kea kal, thla kipa infiamna huaihawt, kohhran/TKP chanchinbu leh social media kaltlanga hriselna lam hawi inzirtir, member-te hriselna dinhmun endik, inzirtirna thuziak sem darh, intlansiak, thu inziahsiak leh hma lakna remchang dang kalpui tum a ni.
Hriselna lamah TKP thawhpui rel
