July 6 (Inrinni) zing dar 6.00 vel khan Kulikawn Ngaizel khama saza humhalh lai chu a thi a, a taksa enfiah a nih hnu ah hriselna tha lo takin a tlakbuak vang a ni tih hmuhchhuah a ni.
Ngaizel kham huamchhung, World bank Road petrol pump bul kawng chhak lamah saza humhalh lai hi Inrinni zing khan chau taka hmuh a ni a. A tira hmutu T Ngaihliana sawi danin, a thawm a hria a, a han hmuh chuan a lo la thi lo deuh a, a bawihsawm nghal naa, a chatthla zui ta mai a ni.
He thu hi an hriat ve leh Forest department leh ASEP chu a hmunah an kal nghal a. YMA Kulikawn Branch hnuaia Zampuimanga Section-in a ruang hi puanin an tuam a ni. Vety hospital lama post mortem tura lak a ni a, a hriselna dinhmun a lo tha lo hle tih hmuhchhuah niin, kawthalo leh thin lian bakah natna chi hrang hrangin a tlakbuak nasa a. Chuvanga taksa chak lo vanduaina tawk ta nia ngaih a ni.
ASEP sawi danin, a taksaah silaia kahna emaw thanga awhna hliam emaw hnuhma hmuh a ni loa, hri inkai darh theih vei niin a lang lo bawk. Kum 13 vela upa niin, kg.70 a rit a ni. Post mortem exam a nih hnu-ah Forest department-in phum turin an kalpui a ni.
Ramsa leh ramngaw humhalh lama hma latu tlawmngai pawl – ASEP chuan, he saza thi chungchangah a tira lo hmutu Pu T Ngaihliana leh Kulikawn YMA Zampuimanga section fakawm an tih thu a sawi a. An ni bakah felfai taka buaipui ngai zawng zawng buaipuitu Forest department leh Vety department chungah an lawm hle tih a sawi a ni.
Hriselna tha lo vangin Saza humhalh lai a thi
