Mizoram Board of School Education (MBSE) chuan May 14 (Thawhlehni) khan High School Leaving Certificate (HSLC) 2024 exam result a tichhuak a, zirlai exam zinga za zela 73.37-in an pass. Pass percentage hi nikum aia a sanna chu 2.23% a ni a; nikumah 71.14% an pass a ni. HSLC 2024 exam beitu hi zirlai 18561 niin; zirlai 13618 an hlawhtling a, zirlai 4837 an fail. Zirlai hlawhtling zingah distinction-a pass 1332 an awm a; first division-ah 3801, second division 5564 leh third division 2921 an awm.
Compartmental chance nei zirlai 106 an awm a, compartmental examination neih hun tur erawh ruat a la ni lo. Tun tumah hian, National Education Policy 2020 zulzuiin, exam pass-te hian, an duh ber subject pakhatah exam an bei nawn thei dawn a ni.
A pumpuiah Lalmoipuia Lawmzual s/o H Lawmzuala, St. Paul’s Higher Secondary School chu pakhatna a ni a, full mark 500-ah mark 485 hmuin subject zawng zawngah letter a hmu. Top ten-ah zirlai 14, mipa 5 leh hmeichhia 9 an awm a ni.
Top ten-a lang school-te hi – St Joseph HSS (3rd, 4th, 5th, 9th & 10th); St. Paul’s HSS (1st, 2nd, 6th & 8th); Goodwill English Academy, Serchhip (7th); Mount Carmel School, Chaltlang (9th); Greenland HSS Ramhlun North (10th); St James School, Chawlhhmun(10th); KD HS, Saron Veng (10th) te an ni.
Zirlai exam zawng zawng pass vekna school 85 a awm a, heng zinga 14 chu sawrkar sikul niin, Kolasib chu district capital zinga 100% pass (Govt Kolasib High School) nei awmchhun a ni. Pass vekna school zingah hian Maraland Academy Siaha chu distinction ngah ber (9 out of 10) a ni bawk.
Zirlai exam zawng zawng fail vekna school 18 awmin, heng zinga pahnih chu sawrkar sikul a ni. Lawngtlaiah 100% failed sikul pahnih, sawrkar leh private awmin failed school ngah ber a ni.
Sikul hrang hrang (management-wise) zingah sawrkar enkawl sikul (govt school) an hniam ber a, deficit school an titha ber. Deficit school atangin 91.2% an pass a. A dawtah private school (83.22%); pathumna lumpsum school (74.45%); palina aided school (66.36%), pangana govt school (63.28%) a ni.
Kum 20 chhunga
HSLC results
Year Pass(%)
2005 45.77
2006 40.49
2007 51.46
2008 62.40
2009 60.46
2010 66.60
2011 69.99
2012 72.27
2013 58.63
2014 67.51
2015 68.30
2016 71.17
2017 72.17
2018 76.65
2019 67.93
2020 68.33
2021 82.43
2022 70.64
2023 71.14
2024 73.37