HSLC 2025-ah 76.68% pass
Sawrkar sikul hma sawn hret
Mizoram Board of School Education (MBSE) chuan Thawhlehni khan High School Leaving Certificate (HSLC) 2025 exam result a tichhuak a, zirlai exam zinga za zela 76.68-in an pass.
Nikum HSLC pass percentage kha 73.37% a ni a, kumin HSLC exam result a san zawkna chu 3.31% a ni.
Sawrkar enkawl sikulin nikum aiin hma an sawn hret a, 68.01% an pass a; nikum khan 63.28% an pass. Nikum aia kumin sawrkar sikul result sanna hi 4.73% a ni.
Management wise-ah erawh sawrkar sikul an hniam ber thung. Deficit school an sang ber a, 92.62% an pass a, private school-in dawtin 85.54% an pass. Pathumna chu Lumpsum school niin 77.29% an pass a, palina aided school pass percentage chu 68.37% a ni.
Kumin result hi MBSE hnuaia HSLC exam result a that ber dawttu a ni a, kum 2021 kha result that ber tum niin 82.43% an pass a ni.
HSLC 2025 exam beitu hi zirlai 18946 niin; zirlai 14527 an hlawhtling a, zirlai 4355 an fail. Zirlai hlawhtling zingah distinction-a pass 1343 an awm a; first division-ah 3763, second division 5785 leh third division 3636 an awm.
A pumpuiah PC Lalthakimi d/o Darthuama, KD High School Aizawl pakhatna a ni a, full mark 500-ah mark 479 hmuin subject zawng zawngah letter a hmu.
Top ten-ah zirlai 24, mipa 14 leh hmeichhia 10 an awm a. Kumin top ten-ah hian Aizawl pawn an lang tam lo hle a; Baptist HSS Serkawn tih loh chu Aizawl chhung ami vek an ni. St Paul’s HSS atangin 9; St Joseph HSS atangin 8; Mt Carmel School atangin 2; a bak chu KD HS-1 (1st); Govt Mizo HS-1 (2nd); CLS Academy-1 (2nd) an awm a ni.
Zirlai exam zawng zawng pass vekna school 107 a awm a, heng zinga 21 chu sawrkar sikul a ni. Zirlai exam zawng zawng fail vekna school 13 awmin, heng zinga pahnih chu sawrkar sikul a ni. Nikum khan pass vekna school 85 a awm a, fail vekna school 18 a awm.
Kuminah hian compartmental chance nei zirlai 64 an awm a, compartmental examination neih hun tur erawh ruat a la ni lo. Tun tumah pawh hian National Education Policy 2020 zulzuiin exam pass-te hian an duh ber subject pakhatah exam an bei nawn thei dawn a ni.
Kum 20 chhunga HSLC result %:
Year Pass(%)
2006 40.49
2007 51.46
2008 62.40
2009 60.46
2010 66.60
2011 69.99
2012 72.27
2013 58.63
2014 67.51
2015 68.30
2016 71.17
2017 72.17
2018 76.65
2019 67.93
2020 68.33
2021 82.43
2022 70.64
2023 71.14
2024 73.37
2025 76.68
HSLC 2025-ah 76.68% pass Sawrkar sikul hma sawn hret
