2024 Higher Secondary School Leaving Certificate (HSSLC) exam result chhuaka Arts, Science, Commerce subject-a Mizo zirlai top 3 chin ho chu Mizo Students’ Union chuan Zirtawpni khan lawmpuina an hlan a. MSU Special Award 2024 an sem bawk.
Hmanpuitu School Education minister Dr Vanlalthlana chuan, zirlai kan nih chuan khawtlang leh kohhrana inhman dan chin tawk kan thiam a ngai, tia sawiin, “Kan zirna kan hlawhtlin hunah theihtawpa inhman zawk tur a ni,” a ti.
Kan nih tum kan hlen theihna tur a nih chuan midang tih ang kan tih loh ngam a ngai a, thiante tih ang ti ve zel loa, keimahni kan danglam ngam a ngai, tiin a sawi bawk.
Hmanpuitu dang ZIDCO chairman JK Dawngzuala chuan zirlaite chu lehkha zir chung pawha thawhchhuah nei turin a chah. “A tam emaw a tlem emaw mahni pocket money tur tal chu kan thawkchhuak tur a ni. Mahni thawhchhuah hlut zia kan hriat a ngai a, chu chuan puitlinna lamah min hruai dawn a ni,” a ti.
MSU president Samuel Zoramthanpuia chuan, hnamdang pasal neite lakah kohhran leh khawtlang kan thikthu tih chhiat a tul viau tawh tih sawiin, “Zofate hi chimral kan nih mai lohna tura kan tanrual a pawimawh a ni,” a ti.
HSSLC Mizo top 3:
Arts
1. Linden Lalremruatpuia Oikos HSS
2. Vungnemkim Khuptong Mount Carmel School
3. Rody Lalrotluangi Mount Carmel School
Science
1. Lalramdina Ralte St. Paul’s HSS
2. Lalremruata Ralte St. Paul’s HSS
3. Fakzuala Chawngthu St. Paul’s HSS
Commerce
1. David Lalhminghlua St. Paul’s HSS
2. Amram Laihnei Hlychho St. Joseph HSS
3. Vansangkimi Oikos HSS