Information & Public Relations minister Lalruatkima chuan a bial chhung atanga 2023 HSSLC exam Arts-a 6-na Ruth Larohlui lawmpuina a hmanpui a, lawmpuina atan laptop a hlan. A lehkhabu ziah ‘Shallow’ chu tlangzarh sak nghal bawk.
Minister chuan a bial chhung atanga Mizoram puma 6-na ni pha an awm chu a ropuiin lawmawm a tih thu a sawi a. HSSLC pass hlimin Sap tawnga lehkhabu puitling a ziak thei chu a chhuanawm takzet tih a sawi. Tuna a hlawhtlinna chu duhtawk mai loin, hmalam pan zel turin duhsakna a hlan.
Lehkhabu chhiar tam a pawimawh hle, tiin, thangtharten uar zel se a duh tih Lalruatkima hian a sawi a. Lehkha chhiar chu finna bul a nih thu sawiin, rilru leh ngaihtuahna tizautu leh midang kaihruai thei tura remhriatna petu a ni tih hrereng turin a chah.
HSSLC Arts-a 6-na Ruth-i lehkhabu ziah tlangzarh
