Kumina India ram naupang 56 hnena huaisen chawimawina pek tur zingah Mizo naupang pali an tel.
Kumin Republic Day pualin Prime minister chuan heng naupang hnenah hian huaisen chawimawina a hlan dawn a. Covid 19 leng vanga kum 2020 atanga sem mumal tawh loh he chawimawina hi kuminah dan pangngai angin sem chhunzawm a ni dawn.
Mizoram State Council for Child Welfare hotute sawi danin, heng tun tuma chawimawina dawng tur mi pathum – Vanlalfela, Jolyn Malsawmsanga leh Lalramliana te hi kum 2022-a dawng tura thlan tawh an ni a, hrileng vangin Republic Day ah tum dang angin hetiang hun hi ruahman a remchang loa, kumina dawng tura thlan Christian Vannunzira nen an dawng rual dawn a ni.
Vanlalfela (10) s/o Lalrinthanga, Lungrang South Lunglei district hi a pa nen 2020 November 24 khan an huanah hna thawkin an kal a, an hnathawk zo chu a pa hian chawhmeh zawngin an chhak lam ramah a kalsan a, a rawn haw lam chu a thing zar vawn lai tliakin a lum zui a, thi chhawnga a pa awm hi Vanlalfela hian bawihsawmin khuaah a zualko a, khawchhung miten buauipui zuiin damdawi in panpui nghal a ni a, dam taka enkawl a ni.
Jolyn Malsawmtluanga (15) s/o Lalmuankima, Pukpui Lunglei khua hi 2020 November 30 khan Pukpui Sub Centre bula ambulance hlui hunah naupangho infiamin a chungah an lawn a, an zing ami Moses Lalruatfela (11) s/o Zonuntluanga chu electric current-in a man a, a ni hian huaisen takin a chhanchhuak a ni.
Lalramliana (11) s/o Lalrinchhana, New Hruaikawn Champhai district hi an khuaa a thianpa Joseph Malsawmtluanga (13) s/o Suiliamkhama nen 2021 August 2 khan an khua atanga km. 1.5 vela hla Kurungluiah mautuai khawrhin kal a, an khawrh zo tuia an cheng chu a thianpa hi tuiah a tla a, Lalramliana hian chharin luikamah a hnukchhuak a, a awmah nemin thiam ang anga a bawihsawm hnu ah a lo harh leh ta a ni.
Christian Vannunzira (9) s/o Rosangzuala, Chhingchhip Venghlun hi a unau mi pathumte nen an khua atanga metre 150 vela hla Chhungatuikawnah an kal a, Khawvanrial bu tawn darhin khuai hian an bei zui a, Noel Vannunhlimi chu a insaseng ve thei lo a, Christian Vannunzira hian a theih ang angin khuai lakah hian chhanin an zuk rawn tur a veng a, amah pawh hi khuai hian an zuk nasa hle a ni. Lirthei rawn kala chuangten an pui zui a, nunna chan em awm loin naupang palite hi damdawi ina enkawl an nih hnu ah dam takin an chhuak vek a ni.
National Bravery Award hi naupang kum 18 la tling lote hnena India sawrkar leh Indian Council for Child Welfare in a pek thin a ni. Kum 1957 atanga pek tan niin, kumtin he award dawng thei tur hi thehluh khawm thin a ni a, mi 25 aia tam lo thlanchhuah thin an ni tlangpui. Kum 2020-a pek tura thlan mi 22, 2021-a pek tura thlan mi 16 leh 2022-a pek tura thlan mi 18, an vaiin naupang 56 hnenah kumin hian hlan a ni dawn.
Huaisen chawimawina dawng tur Mizoram naupang palite hian January 17 khan New Delhi an thleng tawh a, January 30 ah Mizoramah an lo let leh ang.