Minister Lalrinpuii chuan nimin khan press meet neiin, kum hnih chhunga a enkawl department pahnih —health & family welfare leh, social welfare, women & child development hnuaia hmalakna hrang hrangte a tarlang a. Health hnuaiah hmasawnna thar tam tak hmuh tur a awm a; social welfare hnuaiah pawh hmalakna thar tha tak tak a awm bawk a, a lawmawm hle.
Hmasawnna leh hmachhawp sawi zui chakawm tak tak awm teuh mah se, helai hmun zim têa tarlan sen a nih dawn loh avangin ‘Hulhliap Short Stay Centre’ chungchang hi thlurbing ila.
Hemi chungchang nimina report a nih dan chu: “Khawlaia ruihhlo ngai an tam em avangin anmahni enkawl lailawkna tura buatsaih, Hulhliap Short Stay Centre chu social welfare, women & child department bul tumin sawrkar department hrang hrang, kohhran leh mimal/mithiam tlawmngai thawh hona tha tak zarah batch 6-na chu December ni 6 khan hlawhtling taka zawh fel a ni…” tiin. Technical report: —1st batch atanga 6th batch thlengin mi 1528 admit an ni a, mi 937-in inenkawl hun chhung an awm tluan” tih a ni bawk.
Hulhliap Short Stay Centre din chhan “Khawlaiah ruihhlo ngai an tam em avangin” tih hi a lungchhiatthlak lai tak chu a ni awm e. ‘Khawlaia ruihhlo ngai awmte’ a ni mai lova, ‘khawlaiah ruihhlo ngai engemawzat an awm’ tih pawh a ni lova, ‘an tam em avangin’ tih a ni.
Batch 6 chhungin mi 1528 an lut a, chawhrualin batch khatah mi 254 zel lut ang an ni. Heti zat khawlaia ruihhlo ngai khâwm tur an awm thin a nih chuan, “Engati em em nge?” tia kan inzawh a pawimawh ta a ni.
Ruihhlo ngai khawlaia tei suau suau te hi tihdam tumin kan umzui thei a, kan umzui peih a, tha leh zung, sum leh pai tam tak tak sengin kan enkawl thei a nih chuan, ruihhlo laka la fihlim, mahse ruihhlo ngai ve mai thei dinhmuna ding mek naupang thanglai leh thalaite ruihhlo laka an fihlim zel theihna atan hian, tuna Hulhliap programme atana kan thawk ho ang bawk hian, kan thawk ho tho em? tih hi zawhna pawimawh tak a ni bawk awm e.
Kan kalphung pakhat nia lang chu- a bulthum atanga uluk si lova a ler lama na taka thuai kan ching thin hi a ni awm e. Hei hi education kan kalpui mek dan pawh hi niin a lang.
Hulhliap Short Stay Centre…
