Hun bituk chhung awm loin thlai thar leisak ngei rawh se – Lalchhandama Ralte

Hun bituk chhung awm loin
thlai thar leisak ngei rawh se
– Lalchhandama Ralte
MLA inthlanpui hmaa an intiam angin ZPM sawrkar chuan hun bituk awm loin thlai thar lei sak ngei turin an phut tih leader of opposition Lalchhandama Ralte chuan a sawi.
Thawhtannia an party office-a inkhawmah MNF vice president Lalchhandama Ralte chuan loneituten thlai an thar tan a, Krismas thawmhnaw leina atan leh kohhran thawhlawm atan loneituten Krismas hma ngeia hman an duh laiin, sawrkarin kumthar lam daiha lei a tum chu a dik lo tih a sawi. “Transport subsidy siam si loa Collection Center tlem azawng chauha thlai thar lei an tum hi a dik lo. Thingtlang khaw tinah sawrkar hian lei rawh se,” a ti.
Kuthnathawktute thawhrah chu sawrkarin a intiam anga leisak tura ngenin, “January atanga May chhung chauh thlai lei an tum hi kuthnathawktute hmuhsitna a ni. India sawrkarin thlai thlan bik 24-ah kumtluana support price a pe ang hian, hun reilote chauh hawng loin kumtluanin support price pe ve se. An intiam ang ngeiin hmarcha, sawhthing, aieng leh hmunphiah hi lei se; eng eng emaw dan phuah kual phauh kual lo hian kuthnathawktute tharchhuah hi a leina tur rate an sawi ang hian leisak rawh se,” a ti.
ZPM chuan an sawrkar phatah ZMC leh airport hralh an sawi a, small hydel project zawng zawng hralh an tum bakah Chaltlang Tourist Lodge hralh an tum tih leader of opposition hian a sawi a. Lengpui Airport hralh tum chu ngaihtuah nawn turin an ngen tih a sawi.
ZPM sawrkar chu hnam thilah MNF leh Congress atangin zirlai zir se a duh tih sawiin, “Hnam thil a awm reng rengin opposition hian sawrkar kan thawhpui thin. All NGO leh all party anga hmalakna tur thilah an duh duha thil an ti thin hi a fuh lo. Hnam pawi an sawi a hlauhawm ta hle,” a ti.
Politics-a phuba lakna atan Mizoram Subordinate Services Selection Board an thiat niin Lalchhandama Ralte hian a sawi a. MPSC thuamthat an tum chu sawrkar a inrawlh thuk lutuk nge, an hminghliau nasa ta hle tih a sawi. Entomologist lak turah kumtira short list siam tawh chu an cancel hnu ah screening an titha a, mithar lut nawlhin a tling ta niin a sawi. Vety assistant surgeon lak tur result a chhuak a, exam lo 5 an tling niin a sawi bawk. “Tunhnaiah buaichuar a tam hle. MPSC hming hliau hi a pawi ka ti hle a, sawrkarin MPSC rintlak a din leh theihnan hma la rawh se,” a ti.