Sawrkar hnathawk hotu lu ber chief secretary te hian an hna an zawm hlimchhawna sawi hmasak bera an neih thin chu ‘hun vawn dik’ hi a ni thin. A tir lamah chuan an han kengkawh tha viau a, a lo rei a, ngai kan awh chho leh mai thin. Sawrkar tharin ngaih pawimawh hmasaka a neih thin pawh ‘hun vawn dik’ tho hi a ni. A lo rei deuh a, ngai kan awh leh mai thin.
Tun sawrkar tharah pawh hian hun vawn dik hian sawi a hlawh bawk; biometric attendance system te pawh sawi rik a ni a, hma lak nghal rum rum pawh a ni. Tuna a sarhu lai hi chuan hun vawn dik lamah hma kan sawn viau; a rei leh deuh ang a, ngai kan awh leh mai dawn nge, chu chu hunin a la rawn hril ang a.
Pawisa a nih tur ang ni lova hman hi eirukna a nih chuan, hun vawn dik loh pawh hi eirukna tho a ni. Office hour hi sawrkarin thlasik leh nipuiah hunbi a bituk thlap a, Nipui lai leh Thlasik lai hnathawh hun chhung inang lo deuh mah se, ni khatah darkar 8 hnathawh hun bituk ang a ni. Zing dar 9-a office thlen tur a nih laia dar 9:30-ah office a thlen chuan darkar chanve a eiru tihna a ni. Tlai lamah dar 5-a office chhuahsan tur a nih laiin dar 4-ah a chhuahsan chuan darkar khat a eiru tihna a ni.
Sawrkar hnathawk officer pakhat, thlakhata Rs 1,00,000 hlawh chuan, nikhatah Rs 3333.33 a hlawh a, darkar khatah Rs 417 a hlawh tihna a ni. Ni tin darkar khat leh a chanve a eiruk ziah chuan, chu chu pawisain Rs 625 tihna a ni a; thlakhatah chuan 625×30=18,750 tihna a ni.
Cheng nuaikhat hlawh pha chin officer 100 rual ten ni tin darkar khat leh a chanve an eiruk ziah chuan, thlakhatah Cheng nuai 18.75 a lo tlingkhawm hman dawn a, kum khatah chuan nuai 225 a lo tling hman dawn a ni.
Hei hi entirna mai mah ni se, a tak takah chuan ngaihruat aia nasa daih pawh hi a nih a rinawm a, hun vawn dik loh avanga eirukna a nasat dan tur leh, sawrkarin sum a sen thlawn mai piah lamah, mipui harsatna a thlen nasat dan tur chu a hriat ruak mai awm e. Chhiatni thatni thil chhuanlama office chhuahsan nen phei chuan, ni tina hun eiruk avanga sawrkarin sum a sen tam dan tur chu sawiin a siak lo a ni.
Hun vawn dik hi sum renchemna a nih bakah kawng tinrenga hmasawnna a ni. Hun vawng dik apiang an changkang a, hma pawh an sawn a ni.
Hun eirukna…
![](https://theaizawlpost.org/wp-content/uploads/tap_logo-min-large.jpg)