Hungary ramah Norris chak ve ta nawlh!
Khawl lam chiankuan loh vangina team-mate Oscar Piastri chuan a hmahruaina a tawpsan a ngai a, hei hi hlawkpuiin Lando Norris chuan Pathianni Hungarian Grand Prix-ah hnehna changin, kha kha Formula One season kal laia McLaren-in race hnehna a sualchhuah vawi khatna niin, Briton Norris tan nikum November thla Sao Paulo hnehna a chan hnu lama grand prix hnehna a lawm leh tum khatna chiah a ni.
Driver standing lama hmahruaitu ni mek Mercedes driver Kimi Antonelli chuan grid penalty vangin pasarihna daihah bul tan mah se pathumna a luah pha a, lawmman semna dawhsan hniam berin a ken tel point hmangin championship table-ah point 50-in hma a hruai fal.
Budapest khaw intlansiakah hian Ferrari star Lewis Hamilton pawh five-second pit-lane speeding penalty avangin palina atangin panganaah a tlahniam a, chu chu a tapwna niin podium a luah pha lo a; huaisen taka recovery drive min hmuhtirtu Red Bull driver Max Verstappen chu pahnihnaah a thleng thung.
Hungaroring tlankawnga hnehna a chan hnuah Norris chuan a car vawn lai fak chungin inrintawkna a neih chhah sawt thu leh race ropui tak a hlenchhuak nia a ngaih thu a sawi a, “Race number one-a ka kirleh thei hi ka hlim hle a ni,” a ti.
Bul tan chhe zet Mercedes driver George Russell chu 19-naah tlahniam hman mah se point hmu pha zawngin pasarihnaah a thleng a, overall standing-ah pathumna la luah pha mah se point 59 zetin a Italian team-mate rawlthar kum 19 mi Andrea Kimi Antonelli nen an inthlau tawh.
Pole position atanga bul tan Norris tan tun kha a career-a grand prix hnhna tum 12 a channa ni ve tawhin, Hungary bikah nikum khan a chak tawh a, a zawnin he tlankawngah hian a chak ta a ni.
Formula 1 hian nipui chawlh an hmang chhunzawm ve lawk dawn a, chawlhkar li an chawlh hnuah thla thar August ni 21-23 chhung khian Dutch Grand Prix hmachhawn turin tun season tawp ruala circuit contract hmang zo tawh tur Zandvoort lamah F1 team an fuankhawm zui leh dawn a ni.
Hungary ramah Norris chak ve ta nawlh!
