Hungary ramah pawh Verstappen khing zo awm lo
Tun season Formula One intlansiak vawi 11 awm tawha a vawikuana atan Red Bull driver Max Verstappen chuan Hungarian Grand Prix-ah hnehna chang lehin, F1 race hnuhnung vawisarihah a chak fai vek bawk.
Red Bull team pawhin record siamin grand prix intlansiak hnuhnung vawi 12-ah an driver-te’n hnehna an chang vek a, tun season bika race vawi 11 awm tawha vawihnih dangah Ver-stappen-a team-mate Sergio Perez a chak ve bawk.
Red Bull team hi nikum season kharna Abu Dhabi intlansiak atang khan an la chak tluan chho zel a ni.
Red Bull-in race hnehna chang zawn rei ber record an siam hmaa record siamtu chu vawi 11 chak zawn McLaren niin, kum 1988 daih tawh khan an driver pahnih Ayrton Senna leh Alain Prost kaltlangin record hmasa an siam a, hun rei tak hnuah Red Bull-in an rawn khum thei ta hram a ni.
Pathiannia Hungaroring tlankawngah McLaren driver Lando Norris chuan Red Bull driver pakhat zawk Sergio Perez dang tluan theiin pahnihnaah a thleng a, Mexican driver Perez hi pathumna niin, Red Bull one-two a thleng zo ta lo a ni.
Pole position atanga tlan-chhuak Lewis Hamilton chuan lap tawp lamah Perez hnaih chho viau thin mah se a lehpel zo ta ngang lo a, palina a lung-awipui a ngai.
World champion vawisarih tehreng ni tawh Briton Hamilton hian season bul tan fuh lo mah se hma a rawn sawn chho a, Pathianni Hungarian Grand Prix-ah pawh lawmman semna dawhsan beisei ngam turin qualifying-ah a chetha ber a, a zawna pole position vawinga luah tling Verstappen-a kal tluang lai dangchatin kum 2021 hnu lama a vawikhatna atan pole position a luah a, mahse, podium erawh a lawnkai zo ta lo a ni.
Hungary ramah pawh Verstappen khing zo awm lo
