Hunpuiah police an tang dawn
Jail-a luh ngai lo turin an chah
Hunpui laiin Aizawl district-ah police an tang hle dawn a, Krismas leh kumthar jail-a hman ngai loa dan bawhchhe lo hram turin mipui an chah tih Aizawl SP Zosangliana chuan a sawi.
Aizawl SP chuan hmun hrang hrangah check post an siam a, Traffic Police duty pui turin lirthei tlan chak lutuk, rui chunga lirthei khalh leh license nei loa lirthei khalh an endik dawn tih a sawi a. Tunah pawh ngawrh taka an duty reng tawh chungin, December 23 atanga January 2 thleng bik phei chu Deputy SP kaihhruaiin chan insemin tlaivarin an duty dawn a, ke leh lirthei hmangin patrolling an nei thin dawn tih a sawi.
Sawrkarin a khap halpuah leh halmawi lam chi pawh ngawrh takin an dap a, Central YMA nen tangdunin an la dap leh dawn tih a sawi a ni.
“Sawrkarin a khap chi ho tel loin hunpui hmang hram ang u. Bawhchhe lui chu na takin action lak a ni dawn a; Krismas leh kumthar jail chhunga hman ngai loa dan bawhchhe lo turin mipui kan ngen a ni,” a ti.
Hunpuiah police an tang dawn Jail-a luh ngai lo turin an chah
