CYMA leh Mizoram Volleyball Association (MVA) te buatsaih LBS Suzuki Avenis, 24th Inter Branch YMA Volleyball Tournament 2026 chu khelh chhunzawm zel niin a hmawrbawk a hnai. Hmeichhe lamah semi-final khelh hmabak a ni a, mipa lamah vawiin hian quarter-final khelh zawh a ni dawn. Quarter-final ah vawi thum champion tawh ve ve Hunthar leh Maubawk intum turin ngaihven a hlawh hle. Hunthar lehMaubawk te hi vawiin a inkhel hnuhnung berah an inhmachhawn dawn.,
Hunthar vs Maubawk
YMA Volleyball a hnuhma nei tha ber Hunthar hian inrinni a n khingpui Hmuntha chu set hloh lovin an hneh a, quarter-final lut turin harsatna lian an la tawk lo. Champion tura rinkai Hunthar hian last 16-a an khingpui Hmuntha lakah bul an tan tha viau a, an khingpuite hian set khatnaah point 17 bak an hmu thei lo. Set hnihnaah Hmuntha khel tha hret mah se point 21 an hmu hram a, Hunthar set lak belh tur an dang thei lo.
Set hnih an lak zawn hnuin set thumnaah pawh Hunthar an khel tha chhunzawm a, point 3 a sang fal chunga set la nawn lehin Hmuntha lakah hian 25-17, 25-21, 25-22 a hnehna changin quarter-final an lut. Last 16-a an chak thlengin harsatna la tawk lo mah se quarter-final-ah khingpui hautak Maubawk an hmachhawn a ngai dawn ta a, Hunthar dinhmun a hriat chian leh zual theih dawn.
Hunthar laka fiahna hautak hmachhawn tur Maubawk hian last 16-a an khingpui Bengkawn West lakah set hnih an hloh hmasak zet hnuin hnehna an chang let a, harsa takin quarter-final an lut.
YMA Volleyball a vawi thum champion tawh Maubawk hian last 16-a an khingpui Bungkawn West lakah bul an tan tha lova, set khatnaah point 17 bak an hmu thei lo. Set hnihnaah an inhnehtawk viau a, Bungkawn W’ in set lak tum viau mah se deuce-ah vanduai zawk an ni zui leh a, set hnih an hloh zawn.
Set hnih an lak zawn vangin Bungkawng West Br. dinhmun a tha hman viau a, quarter-final luh theihna hun tha tak an nei. Dinhmun chhe taka ding Maubawk in huaisen takin an khingpuite an bei let a, awlsam takin set thum an la zawn. Set thumnaah an khingpui ten point 19 chauh an hmu a, Maubawk in set an la ve ta nge nge. Set khat an lak hnuin an khel tha leh zual a, set linaah an khingpui ten point 12 chauh an hmu. Set hnih ve ve an lak hnuin dedeciding set khelh chhunzawm a ni. Deciding set boruak sangah Bungkawn West in inrintawkna an hloh a, point 2 bak an hmu thei lo. Tla lek lek tawh Maubawkin an khingpu Bungkawn West hi point 17 -25, 24-26, 25-19, 25-12, 15-2 in an hneh a, mak leh ropui takin quarter-final an inhlangkai zui ta a ni.
Quarter-final hi vawiin chawhma dar 10:00 atangin khelh tan a ni dawn. Hmeichhe inkhel a awm dawn loh vangin court khatah chauh khelh tur a ni a, mipa quarter-final khelh zawh a ni ang. Inkhel hmuhnawm ber tura ngaih; Hunthar leh Maubawk te hi quarter-final match lina, inkhel hnuhnung ber tur a ni.
Muana Veng an kal zel
YMA Volleyball a champion lai Muana Vengin champion nawn leh tumin hma lam an pan zel a, set hloh lova Lungdai Br. hnehinquarter-final an lut. Muana Veng Br. hian quarter-final-ah Electric veng hnehtu Tachhp Br an hmachhawn zui leh dawn.
Champion lai Muana Veng hian last 16-a an khingpui Lungdai chu 25-21, 25-14, 25-17 in an hneh a, quarter-final a an khingpui tur Tachhip chuan last 16-a an khingpui Electric Veng chu 25-17, 25-23, 23-25, 25-15 in an hneh. Muana Veng leh Tachhip hian quarter-final hmasa ber an khel dawn a, chawhma dar 10:00 ah an inkhel tan ang.
Quarter-final dangah Ngopa Ngopa Hmar Veng leh Khawbel te an intum ang a, Khawhai leh Nursery te an intum dawn bawk a, quarter-final hi a hmuhnawm hlawm viau tura ngaih a ni.
Ngopa Hmar Veng hian last 16-a an khingpui Bungtlang Chhim Veng chu set hloh lovin an hneh a. Khawbel chuan an khingpui Sihphir chu
set khat hloh chungin an hneh ve bawk.
Hunthar hmaa ding tur Maubawk
