Hurricane Erick-in Mexico pan, inralrinna dar khawng

Hurricane Erick-in Mexico pan, inralrinna dar khawng

Hurricane Erick-in Mexico pan, inralrinna dar khawng
Hurricane Erick chuan Mexico chhim lam vaukam a pan mek niin United States National Hurricane Center (NHC) chuan a sawi a, ruah thahnem tak, tui fawn nasa tak thlenin lei min pawh a thlen thei niin an sawi a. ‘Tui lian leh lei min hi nunna atana hlauhawm’ ni thei a ni dawn tih an sawi bawk.
Tropical storm, Erick hi Nilaini (India-a zan lam) khan Category 2 hurricane-ah insiam darkar khata km 155-a chak thli a keng tel niin meteorological centre chuan a sawi a. Mexico-a chhim lam state, Oaxaca-a Puerto Angel atanga km 165-a hlaah a awm mek tih an sawi.
“Vawiinah chak zawkin a insiam beisei a ni a, Erick hi hurricane chak tak ni chungin Mexico chhim lam a pan a ni,” tiin NHC chuan Ningani tuk khan a sawi.
Hurricane na an tih chin hi Category 3 leh a aia chak, thlipui darkar khata km 180 vela chak chin hi a ni.
Khaw chin zirtute chuan Mexican chhim lama Oaxaca leh Guerrero state-ah te ruah tam tak a sur dawn niin an sawi lawk a. Chiapas, Michoacan, Colima leh Jalisco-ah pawh ruah sur dawn niin an sawi lawk bawk.
Acapulco atanga Puerto Angel inkarah inralrinna dar khawn a ni a. Inralrinna hi nunna leh bungrua himna atana chet chhuah ngai tihna a ni tih hurricane centre advisory chuan a sawi.
Mexican President Claudia Sheinbaum-i chuan mi chengte chu inralring turin a ti a. Hurricane kalkawnga awmte chu sorkar thuchhuah ngaichanga mahni chenna leh sorkarin him tura a tihna hmun pan turin a ti.
Guerrero Governor Evelyn Salgado chuan sikul zawng zawng chu Ningani atang khan kharin sangha man leh tuipuia in chhuahte a titawp rih a, lawnglengte pawh hmun hima saseng turin a ti bawk.
Salgado-i chuan mahni in chhuahsana himna zawnga tlan khawmna tur hmun 582 an siam tih a sawi.
Khualzin tamna, Acapulco pawh hurricane kalkawngah hian telin he hmun hi Category 5-a nain October, 2023 khan Hurricane Otis-in a lo nuai tawh a, chhiatna tam tak thlenin mi 52 an thi.
Otis a thawha sorkar chet lakna kha a tha tawk lo tih sawi an tam hle a, inralrinna pawh a pe chhuak tha tawk lo niin an sawi thin.
Nikum September thla khan Category 3-a na John-in Mexico hi a lo nuai tawh bawk a, mi 15 chuang an lo thi tawh bawk.

Comments (0)
Add Comment