Hurricane Melissa hnuhma a chiang tan, mi 34 thi awm tawh

Hurricane Melissa hnuhma a chiang tan, mi 34 thi awm tawh
Jamaica, Haiti leh Cuba-a sulhnu duhawm lo tak hnutchhiahtu, Hurricane Melissa-in chhiatna a thlente a chiang chho zel a, mi 34 vel thi hriat a ni tawh.
Category 5 atanga 2-ah tla tawh mah se Melissa hian Ningani khan Bahamas a nuai leh a, Bermuda a nuai chhunzawm leh bawk.
Caribbean thliarkar nuai tawha na ber hian darkar khata km 298-a chak nen a nuai a, kum 2005-a New Orleans nuaia mi 1,392 thihna thlentu, Hurricane Katrina aiin a na zawk.
US National Hurricane Centre (NHC) chuan Ninganiah pawh khan darkar khata km 165-a chak thli a la keng niin an sawi a. Tuipui kamah tui fawn phul sang tak a la thlen thei a, hmarchhak zawngin a kal zel dawn tih an sawi.
Bahamas-ah chuan ram laili leh chhim lam thliarkara hurricane warning an tihchhuah an hlip leh tawh a, Turks & Caicos-ah pawh hlih leh tawh a ni.
State Disaster Risk Management Minister Leon Lundy chuan mi chengte chu la fimkhur reng turin a chah a, “Hurricane hi chak tawh lo mah se chhiatna la thlen thei a ni reng,” a ti.
Mi 1,500 dawn hmun himah suan chhuah an ni a, Bahamian chanchina insasengna lian ber a nih thu thuneituten an sawi.
Thliarkar awm khawmahte chuan tui lian avangin an buai a, tourism ministry chuan Nassau, Freeport, Eleuthera leh Abacos-ah khualzin veivak a tibuai lem lo thung niin an sawi.
Caribbean hmun dangah chuan Melissa hian in tam tak tichhiain thing a titlu a, mi sang telin power an neih loh phah.
Cuba-a khawpui lian ber pahnihna, Santiago de Cuba-ah chuan mi chengten kawngpuia hnawk awmte chu chem nen an thian a. President Miguel Díaz-Canel chuan hurricane hian ‘chhiatna nasa tak’ a thlen tih a sawi a, thi awm zat erawh a sawi lo.
Jamaica-ah chuan chhimthlang lama St Elizabeth chu a tuar na ber niin khup thleng chirh dai ngai niin tuiin lei a lak avangin Black River chu kân theih a ni lo va. An khawpui, Kingston khawthlang lam dai velah pawh thil a tichhe nasa hle.
Jamaica-ah hian inbiakpawhna pawh a chhe nasa hle a, chhimthlang lam hmun tam zawkah chuan power line leh mobile network a chhia.
Mi sual pawl tharum thawhnain a tihbuai nasat tak, Haiti-ah chuan mi 25 vel an thi a, an zinga 10 hi naupang an ni a. Ruah nasa tak sur avanga tui lianin a lak an ni hlawm.
Jamaica-ah mi pariat thiin Dominican Republic-ah pakhat a thi bawk tih thuneituten an sawi.
NHC chuan Bahamas-ah hian tui lian a kam tawh tih an sawi a. Cuba, Jamaica leh Hispaniola velah erawh ni eng emaw zat inchin fel nan hun an la mamawh dawn.