Hursual thubuaiah McGregor fihlim
UFC fighter Conor McGregor chu kumin June thla khan Florida lamah NBA finals game enin a khawsa a, khatih lai khan mipat hmeichhiat hursualna lama inhnam-hnawiha puh a ni a, mahse, police lamin an chhuichian hnuah chu puhna atang chuan a fihlim a, thubuai a awrh zui dawn ta lo.
Miami khawpuia Kaseya Center VIP bathroom-ah McGregor hi tharum hmanga hmeichhe khuaikhema puh a ni a, a hming tarlan loh puhtu hian a sawi danin bual pindana kalhkhum a nihna atangin security lamin an chhanchhuak niawmin a sawi a, he puhna hi kum 35 mi Irishman chuan pha huk thakin, a ukil chuan an puhnaa thiam an chan tak avangin amah ruaitu fighter pawh a thaw huai tih a sawi!
Tun Nilaini khan Florida state attorney office chuan BBC hnen-ah McGregor laka puhna ‘case’ chu tihtawp a nih tak thu an hrilh.
Tarlan tak angin, he thil thlen hun nia an sawi hi season liamta NBA finals Game 4-a Miami Heat leh Denver Nuggets inhmachhawn lai a ni a; mahse, lar duh vang leh sum duh vangtein hmei-chhe thenkhat hian milarte hi an lo zarbuaiin, an lo timualpho ve chawk tawh thin a, tuna mi pawh hi chhuichian a nih hnuah McGregor laka thubuai han ziahluhna tlakah an ngai lo a, an chhuahzalen ta a ni.
Hursual thubuaiah McGregor fihlim
