Hydel project tenau deuh ho chu sawrkarin outsource vek a tum a, hemi enkawlnana kumtin sum hman thin hum theih tur chu cheng vaibelchhe 7-8 vel a ni tih Power minister F Rodingliana chuan a sawi. A bikin Aizawlah tranformer awmsaten min chawm hneh tawh loh avangin a tam thei ang ber transformer an thlak dawn tih a sawi bawk. Power & Electricity minister chuan ZPM party-in policy-a a lo neih tawh angin, tuna hydel project tereuh te te hi outsource tura hma lak a ni tih a sawi a. Heng hydel project 7 atan hian kumtinin cheng vaibelchhe 7-8 vel thawktu hlawh atan hman thin niin, thawktu indaihlohna avangin, heng hi an outsource chuan heta thawktu hi hmundangah an hmang thei anga, maintenance atana kumtin vaiblechhe tel hman thin chu hum theih a ni dawn a, outsource-na hmang hian kumtin sum tam tak huma lakluh theih an inbeisei tih a sawi
Tunah Suangpuilawn leh Phuaibuang feeder outsource tawh niin, department chuan zawngchhang tlak a ti a. Khawpui chhungah hian feeder pahnih franchisee rintlakte hnena outsource tura tender tum mek a ni tih a sawi a ni.
Tunlai electric current chhiat chhan bulpui ber chu, kan power mamawh a sang thut a; 2017-2018 a kan mamawh zat (peak demand) megawatt 103.05 a nih laiin, 2023-24 ah chuan Mw 160.10 a ni tawh F Rodingliana hian a sawi.
“Hemi kum chhung leka kan mawmawh punna hi Mw 59.06 lai a nih avangin kan hmanruaten a tuar tawh lo. Tunah hian state pumah consumer 295270 kan awm tawh a, kumin April thlengin transformer(DT) 2376 a awm tawh; heng transformer-te hian load an la hnem em em a, tunah hian a bikin Aizawl leh khawpui lian thenkhatah transformer overload, engemaw thulha puak mai thei 325 kan nei a, heng harsatna suking tur hian tun sawrkar kumah hian transformer a tam thei ang ber thlak tura hma lak a ni,” a ti.
Sum indaih loh avangin tum khatah mamawh zawng zawng phuhruk vek theih a ni loa, mamawhna zualpui phuhru turin sawrkar kum kal mekah transformer 40 vel lei tura ruahman niin, engemawzat chu Aizawl thlenpui an ni tawh tih a sawi a ni.
Central scheme – RDSS atangin Aizawl khawpui chhung bikah ABC cable km.575 a sei thlak tura ruahman a ni a, tunah hian km 205.778 thlun tawh niin, thlun hmabak km. 369.22 a awm a, heng avang hian load shedding siam zeuh zeuh a ngai a, mipuie pawhin an hriatthiam a ngai dawn tih a sawi.
Tuirial Hydel Project chu 2018 January 30 khan thawh zawh a ni a. Mw 60 niin, a power siam chhuah zawng zawng Mizoram sawrkarin lei vek tura agreement ziah a ni a; heta tanga zaa 12 chu state-in a thlawha nei tura ziah a ni tih Power minister hian a sawi.
“Agreement ziah a nih danah, CERC Tariff Regulation Act an hman avangin pawn lama power kan hralh chhuahah chhiah kan chang thei lo a. Tunah hian pawnlamah kan hralh chhuah loh avangin a thlawnin power kan nei lo ang a ni. Tuirial atanga power kan dawn ni miah loh man cheng vaibelchhe 102.07 min rawn thing a. A chhan bul ber chu, Mizoram sawrkar leh Tuirial Hydel Project neitu NEEPCO inremna thutlung siam kan lo uluk loh vang a ni,” a ti. Tun sawrkarin agreement hi ennawn a, ziahthat dan an dap tih a sawi a ni.
Hydel project tenau ho outsource tum Transformer tam thei ang thlak dawn
