Centenary C. Lalzahawma
Tùn thleng hian nambar (number) zawha hyphen (-) awm hi puanzâr (banner) tam takah kan hmang sual nasa hle a, mi zawng zawng hmuha tàr thin a ni si a, mi tin ten a hman dàn dik kan hriat chian a pawimawh.
Kohhran inkhâwmpui lian puanzâr (banner)-ah te, General Conference hrang hrangah te, Committee péng hrang hrangah te hyphen (-) a hmanna tùr dik taka kan hman a pawimawh. Zotawngah hi chuan hyphen (-) hi hmanna bîk pawimawh deuh kan nei a, chu chu tawng danga suffix (-ah, -in, -na, -tu, -a, adt) emaw prefix emaw kan behtír dáwnah a ni. Entír nán : Computer-in milem i ziak thiam em? Dubai-ah kan zin dâwn. London-ah zin ka chák.
Number/figure leh suffix zawm nán hyphen (-) hi hman a ni thìn. Entír nán : Kum 1975-ah, kum 2024-ah, dár 2:00-ah, dár 12:30-ah, 1-na, 10-na, 5-a sem, 10-a sem, 5-a puntír, 10-a puntír, 5-in, 10-in, vawi 1-na, vawi 50-na, thurèl 1-na, thurèl 10-na, Thuthlung Hluia a bu 4-na, Thuthlung Thara a bu 5-na leh a dangte. Number hmaah hyphen (-) hi dah lovin, hypen (-) zawhah dah a ni thìn.
Vowel-a tàwp thu mala ‘a’ leh ‘ah’ a bet (suffix) hian chu thu mal thar chu awmze phir a neiha chhìara a chian mai theih loh chuan chhiar sual leh ngaih sual a nih loh nan thuhnung bet (suffix) chu hyphen (-)-a daidan thin tûr a ni. Figure leh foreign word pawhin suffix a neih chuan a suffix nèna daidan nán hyphen (-) hi hman thin tùr a ni bawk. Hyphen (-) chu tlar tàwpa thu mal leng lo a tlar dawta zawm nána a syllable kim china reh bun nán (syllabic division) hman a ni bawk thìn. Tin, hyphen (-) hmanna dang leh chu thu mal pahnih emaw a aia tam emaw pawh thu mal pakhat anga cheibàwl nán (compound word siam nán) a ni.
Hetiang hian dik taka puanzâr (banner)-a ziah thin tùr a ni.
YOUNG MIZO ASSOCIATION RORÈL INKHÂWM VAWI 4-NA,
MIZO ZAIMI INZAWMKHÂWM GENERAL CONFERENCE VAWI 31-NA,
SYNOD INKHÂWMPUI VAWI 100-NA,
CHHIMTÂWP PRESBYTERY INKHÂWMPUI VAWI 7-NA.