I-Day ah CM-in a sawi dik lo tam
– Leader of Opposition
Kumin Independence Day-a chief minister Lalduhoma thusawiah dik lo a tam a, zirtirna dik lo a ni tih leader of opposition Lalchhandama Ralte chuan a sawi.
Thawhtannia Mizo Hnam Run inkhawmah MNF vice president ni bawk Lalchhandama Ralte chuan Independence Day-a chief minister thusawiah khan thudik ziktluak lo leh zirtirna dik lo a tam hle a. I-Day heti zat kan hman tawhah CM-ten kalphung awmsa hmangin – inlawmna, hnam pasaltha zahna, state hmasawnna, chona hmachhawp, future vision, inpumkhatna leh tanrualna thu an sawi thin tih a sawi.
Chief minister-in ZPM sawrkarin leiba vbch. 13584.80 neiin bul an tan, tia a sawi chu ZPM sawrkar hma kum 2023- 2024 budget estimate (BE) figure a ni a; revised estimate (RE) ah vbch. 12709.29 a ni zawk tih a sawi a. Hei hi GSDP atangin 32.29% niin, Finance Commission 15-nain leiba neih a phal chin bituk (33.1%) aiin a hniam tih a sawi.
“Kum 2024- 2025 a ZPM sawrkar budget pharh hmasa berah leiba zat chu vbch. 14034.76 a ni a. RE-ah 38.32% of GSDP a ni. Hei hi FC 15-nain leiba neih a phal chin (32.8%) a khum zawk a ni,” a ti.
Puk ve loh tur thu sawi siin, an sawrkar tuk atanga kumin June thleng (thla 19 chhung) khan source hrang hrang atangin cheng vaibelchhe 6214.27 an puk tawh tih a sawi a. 2023 December-ah vbch. 378.38, 2024 chhungin vbch. 4301.88 (puk theih zat vbch.1037) leh 2025 (upto June) ah vbch. 1534.01 (puk theih zat vbch.1807) an puk tawh a. Kum kal mekah hian an puk theih zat atangin 84.89% an puk tawh tih a sawi a ni.
2024- 2025 ah opening balance vbch. 520.65 neia insawi chu, kumin RE-ah vbch. 156.66 a ni zawk tih leader of opposition hian a sawi a. Kumin 2025-26 ah opening balance vbch. 1099.93 neia a insawi phei chu, budget bu enin minus vbch. 1425.69 a ni zawk tih a sawi.
“An puk tlingkhawm, a huna pekchhuah loh kha budget surplus angin chief minister hian a sawi a nih hmel a. Mithiamte pawhin kumhlui unspent balance/unutilised balance kha surplus/saving an ti ngai lo,” a ti.
Chief minister chu PMJVK, Tax-Finance, District Council, CSR zawng zawng a hnuaiah a lakhawm vek tih sawiin, minister/MLA-te tan tlawn loh theih lohin a inhung tawh a, tunah chuan Super CM a ni mek tawh tih a sawi a ni.
“I-Day ah khan kawng chhia sawi a hnekin, central-in an mi duh tak NHIDCL executive director min rawn pe a, a lawmawm hle. NHIDCL managing director-in Delhi-ah min rawn hmu a tihte hi ram mipui hmaa sawi tham a ni lo. NH 302 – Tlabung atanga Demagiri chu NHIDCL kutah hlan a ni ang, a tihte hi Demagiri hi Tlabung tho, Tlabung hming hlui a ni,” Lalchhandama Ralte hian a ti.
I-Day ah CM-in a sawi dik lo tam – Leader of Opposition
