Niminah State Day vawi 39-na hman a ni a, hemi pual hian Mizoram pum huapa tawngtairualna hun State Day of Prayer hman a ni a. Thupui atan “I din thar leh ang u” Nehemia 2:17 hman a ni.
Jerusalem kulh siamthatu tia sawi Nehemia hian, Persia kuta Jerusalem awm chu a ngaihtuah thei hle a. “Kan chhiatzia hi in hmu a, Jerusalem a ram tih te, kawngkharte a kàng tih te pawh in hria a; hawh u, sawichhiat kan nih tawh loh nan Jerusalem kulh chu i din leh ang u,” tiin Judate, Puithiamte, mi thate, roreltute leh midang hnathawktute hnenah Nehemia hian a sawi a. Anni chuan, “I tho vang u khai; i din teh tak ang u,” an ti a. Chutichuan, chu hna tha thawk tûr chuan an kut an tichak a.
Hei hi Nehemia ziaka kan hmuh dan a ni a. Khatih hun laia Jerusalem dinhmun kha a chhe hle a, din thar leh tura intelkhawmte kha “puithiamte, mi thate, roreltute leh midang hnathawktute..” tih a ni a, mi an chikim hle a ni.
State Day of prayer-ah pawh hian mi kan chikim hle niin a lang. Din thar leh tura Pathian hnena kan dil hi a tlangpuiin ram inrelbawlna tha lo hnuaia thil thleng heng — hlemhletna chi hrang hrang te, ruihhlovin min suasam mek te, HIV/AIDS vanga kan chhiat dan te, leh thildang tha lo leh dik lo tam tak, min lak kiansak tur te pawhin kan dil ngeiin a rinawm. Nehemia hun laia Jerusalem tlakchhiatna ang deuhah khan kan ram hi kan tehkhin te pawh a ni maithei.
Hmuh theih lam Jerusalem hun (era) kha chu a liam tawh a. Tunah hi chuan hmuh theih loh lam Jerusalem, mihring thinlung kulh kawngkhar chhe mek hi “Din thar leh tur” chu niawm tak a ni a, chumi tur chuan ‘kan kut kan tihchak’ a ngai ta a ni ber awm e.
Kan tawngtai nasa a, kan dil nasa a, kan dil nasat ngaihtuah hi chuan thar sur tawh awm tak hi kan ni awm e. Mahse, kan thar sur si lo a, chuvanga tun thlenga State Day-ah pawh tawngtairualna urhsun taka neih ngai thin kan ni a tih theih awm e.
Eng pawh ni se, dil chu a sual lo e, dil turin min ti miau a. Chutih rual erawh chuan, kan dil a hlawhtlin theihna tura a taka thawh chhuah (thil tih) lamah hian tan mar pat chu kan mamawh tel ngeiin a rinawm.
“I din thar leh ang u”
