Nu leh pa nih a, fate thiam taka enkawl hi harsa kan ti Theuh mai. kan thinrim changa Tawngkam na deuh hman chang te kan nei Thin a, chu chu kan mihring zia a ni. Mahse, i thinrimna lo dawngsawngtu chu i fate an nih chuan i rinloh deuhin a nghawng na viau thei a nia.
Hei le, mithiam ten fate hauh nana hman loh atana Tha an tih te kan rawn tarlang e:
1. I fa nen chuan intehkhin ching suh. ‘Nang ang rual ka nih chuan…’ tiin mahni entir nana inhman hi nu leh paten kan fate kan enkawl dana kan tihsual lian tham hmasa ber pawl a ni fo. Hetianga fate zilh fo hian anmahni inrintawkna a tichhe thei a ni. Nang pawh i naupan laia hauh ngaia i awm ve fo Thin zia te kha ngaihtuah teh le.
2. “Thil i ti sual reng mai” tiin a puitlin tawk lohna emaw a tlin tawk lohna te dem nan hmang suh. Tute pawhin thil kan tisual palh thei, kan tihsual hi kan inzirna kawng khat a ni zawk. Nu leh pa kan nihna hi kan fate kan duh zawng tih luih tir lam a ni lova, kawng kawh hmuh a ni zawk.
3. A unau dangte nen tehkhin ching suh. “I u/nau ang hian awm ve rawh”, tih ang chi hman loh tur. I fate theihna chu tehkhin ching suh, chu chuan fate inkar boruak Tha lo, an puitlin hnu thleng pawha an chhawm nun tur a siam zawk hlauh theih a ni.
4. I fa chu ‘Min lo tibuai tei vet suh’ ti a hauh tur a ni lo. Nu leh pa ten a chang chuan mahni a awm fal emaw, thil tih lai te kan nei Thin, chutiang hunah chuan naupangin min hriatthiam pui lova, nu leh pa dawhthei lo deuh chuan, “I ninawm”, tih emaw, “Min lo tibuai ve ziah suh”, tih Tawngkam te hauh nan kan hmang Thin. Hei hian naupang rilruah ngaihthah leh duh loh ni riaua inhriatna te a thlen thei a ni.
5. “I zak chai nange”, tih ang chi Tawngkam te pawh hman loh a Tha. Naupang chimawm ve hrim hrim chu an awm, mahse, hetiang aia Tawngkam nem zawk hi hman tur a ni. Naupang chu a Tha leh Tha lo, a dik leh dik lo thliar hran dan zirtir zawk tur a ni.
6. A Tha lo lama an nu emaw pa te emaw nena tehkhin a, “I pa/nu ang chiah i nih hi” tih te hi chin loh tawp tur. Hetianga tih fo hian kan tehkhin chu an ngaihsanna a tlahniam thei tlat a, nu leh pa zahna te pawh a tlahniam thei.
7. “Min ti zak lutuk” tia fate hauh pawh chin loh tur. Naupang te hi an tum reng vang pawh ni lova an chetsual hi a tam zawk a ni. Chutiang hunah nu leh paten zahpui niawma kan lan hian anmahniah inthiamlohna a neih tir a. Nu leh pate tihlawm tumin, anmahni duhdan ni lova awm an chin phah a, mahni inrintawkna lamah an tlakchhiat phah thei a ni.
8. “Lo nei lo tawp che i la a Tha zawk tur” tia hauh chin loh tur. Hei aia Tawngkam na zawka fate hauh leh dan hi a awm tawh chuang lo. Eng anga thinrim pawh ni la, he Tawngkam hian i dam chhunga i inchhir vawng vawngna tur a thlen thei che a ni.
I fa hauh nana \awngkam hman hauh loh tur
