Lalchhandama Colney
Ph – 9862982321
Kan thupui tura ka han tih hi kum 1980 chho vel laia hla sak hlawh ve tak a ni a, a zawm zel hi, “I kawng zawh lai kha chhut ngun teh boralna lamtluang a ni lo maw,” tih a ni. Hetih vel lai hian zu a zalen hle a, kan khawtlang nun leh kohhran rawngbawlna lam pawh a la hmanlai ang reng hle. Kan ngaihsan zawng te pawh thawk mang loa hausa deuh, thiangzau helh hawlh te kha an ni hlawm thin. He hla siamtu hian kan khawtlang nun leh rawngbawlnate chu a vei hle tih a hriat a, chuvang chuan, i inchhut ngun teh ang, mifel leh tha emaw kan intih lai hian sual lam kawng kan lo zawh reng lo maw, a ti a ni. Hmanlai thil ni deuh tawh mahse la, vawiin thleng hian a la dik reng niin ka hria.
Kawng Zawh Lai Mek Chu – Rev Thangpuiliana(L) khan a ti thin a, “chho a awm chuan chhuk a awm a, chhuk a awm chuan chho a awm bawk”. Vawiinah eng kawng nge kan zawh mek, a then chu harsatna, buaina, vanduaina hial te pawn min chim mek ang, kan rum vawng vawng mai thei. Kan tan khawvel hi a chhe vek, awmna tlak a ni lo, kan ti hial mai thei. Chutiang kan lo nih chuan kawng chho kan zawh mek alo ni ve reng mai, kan tan kawl a eng leh dawn, tunah chau mah ila, ni chhuak eng mawi tak chu a lo lang ve leh thuai dawn, kawng chhuk kan zawh hun a lo thleng ve leh mai dawn. Chutih hunah chuan khang harsatna, buaina kan tawh te kha kan lawmna ti zualtu alo ni ve leh dawn. Hringnun zinkawngah hian a nuam lam ringawt a ni thei lo, chuvang chuan, eng pawh hmachhawn zel thei tura kan inbuatsaih a tha hle.
Kawng Dik Chu – Eng nge ni kawng dik chu ni ber ang aw, ringtu tha tak nih a, kohhrana tel a, thih hnu pawh a vanram kai kha a ni mai lawmi. Zirlaiina taima taka lehkha a zir thin a, sikul/college, etc., ni tin a kal ziah thin chuan kawng dik a zawh a lo ni ve reng mai. Dawrkaite pawh in a rinawm taka an thil zawrh te an zawrh chuan kawng dik an zawh a ni. Chuti ni lo a, buk tling mang lo a a buk thin anih chuan kawng dik lo a zawh, nakinah ama tan a pawi dawn a ni. Sawrkar hnathawkte pawhin mipui chan ai an lak thin chuan kawng dik lo an zawh. Ramhruaitu, mahni inhaivur thin te pawh hian an ti dik lo, an inti hmingchhia, mi sawi sep sep an ni thuai thin. Bible-a kan hmuh, sum tam tak aiin hmingthan hi thlan zawk tur, tih te kha zawm thei ila, kan nun a nuam ang a, miten min hre reng thei dawn a ni. Tum Ram Chu – Mihringte hian engnge kan tum(Goal)ber hi ni ang aw, hetia nun ve mawp mawp a, a tawpa thlanmuala vuiliam ve leh zel mai hi em mi ni ang. Aw le, zirlai chuan a tum ber chu taima taka lehkha zir a, graduate, master degree, doctorate degree-te han neih theih kha a ni ber ang chu. Zirna ina a tum ber pakhat chu naupang mi hman tlak, puitlinga chher chhuah kha a ni. Nu leh pa tena an tum ber chu chhungkaw hlawhtling, tu leh fate mi puitlinga siam a ni. Miin zu, ruihhlo, etc., a buaipui tlat chuan rei lo teah mi hlawhchham, eng ang mi pawh ni se, mi en liam mai mai alo ni mai dawn a ni. Ringtute pawn kan tum ram thleng tur chuan thih thlenga kan rinawm a ngai, a nih loh chuan kan hah thlawn dawn a nih mai hmel e. Kan tum ram theuh thleng thei tur hian tan la thar ila, min tanpui theitu chu Pathian a ni, tih te pawh hre thar leh ila a tha awm e.
Kan rawlthar tan tirh lam hian sakhaw mi tak mai ka ni a, sikul-ah te pawh hian min koh fiam nan, Evan-a, min ti ve hial a ni. Mahse, rei lo teah zu, in ve zeuh zeuh ka lo ching ta a, ka tha viau emaw fel viau emaw ka la inti reng tho. |hangkhat lian zet hnuah chuan sual hian nghet takin, muangchangin, min lo man bet reng tawh tih kan hria a. Mahni that lohna, sualna, etc.,hi chu inhriat a har duh khawp mai. Ka kawng zawh lai mek chu kawng dik a ni tawh lo, boralna lam kawng a ni, tih kan hre chhuak ve ta hlawl mai a, ka tlai hman tep niin ka inhria. Aw le, eng kawng nge kan zawh ve mek hlawm le, zu in mi ka nih chuan ka sim a ngai, nun thlahdah tak ka nih chuan ka sim a ngai. A tawp berah chuan kawng dik kan zawh reng theih nan, peih lo chung chung pawha tawngtai, Bible chhiar, inkhawm te kan tih ve fo a ngai.