Inrinni zan New Delhi inkhelah 4-0 laia Rajasthan United sawp chungin Mizo player tamna RoundGlass Punjab FC chuan India tualchhung league-a a sang ber dawttu ni ta I-League title an hlawhchhuak a, kum 2017-18 champion Minerva Punjab hnu lama Punjab state-a I-League trophy hawn leh thei hmasaber an ni.
RoundGlass Punjab hian khelh 21-ah point 49 an hlawhchhuak a, an hnuai chiaha awm Sreenidi Deccan tan lehpelh ngaihna an awm tawh loh avangin khelh khat hmabak la nei chungin Punjab club an champion.
I-League champion tan season tharah Indian top flight Indian Super League a khelh theih dawn a, mahse, top-tier ISL lama inlan tur hian sum lama tehkhawng awmsa enmil chunga stakeholder-te pawm theih chin an puitlin a ngai thung ang.
Inrinni zan inkhel pawimawhah Punjab tan Chencho Gyeltshen chuan first half minute 16-ah goal hmahruai thunin, chawlhlawk hma minute nga la awmah Luka Majcen chuan a khung belh a, half time-ah RoundGlass-in sihnih faiin hma an hruai phawt.
Second half-ah pawh league hmahruaitu team bawk chungnung chhunzawm lehin, minute 76-ah Juan Mera chuan an goal thumna a thun a; hun pekbelh minute khatna a kal mek laiin Mizo tlangval Hmingthan-mawia (Valpuia’n) he inkhela goal hnuhnung ber leh sili faia RoundGlass Punjab FC chakna goal a thawh ve leh.
Ambedkar Stadium-a point thum an hlawhchhuah leh nen Greek coach Staikos Vergetis-a hoa vul Punjab hian table-ah point riatin hma an hruaifal ta a, Inrinni zan khan nizana khelmual lut Sreenidi Deccan title beiseina an tihtawpsak ta a ni.
Tarlan tak angin, Round-Glass hian Indian club football-a top tier ni ta Indian Super League an khelh theih dawn bakah season-ending Super Cup lamah direct entry an hmu nghal bawk.
I-League champion thar squad-ah hian Mizo player paruk awmin, Inrinni zana goal khat khungtu Valpuia hi Durtlang tlangval niin, centre-back kum 22 mi hi transfer markt tarlan danin Punjab club hian ISL club Mumbai City FC atangin cheng nuai 60-in an lalut a, May 31, 2023 thleng contract a nei.
He team-a Mizo awm ve dangte chu midfielder kum 17 mi Manglenthang Kipgen te, defen-sive midfielder kum 20 mi Freddy Lallawmawma te, left midfielder kum 29 mi Brandon Vanlalremdika te, centre-forward kum 25 mi Daniel Lalhlimpuia leh centre-forward bawk kum 24 mi Samuel Lalmuanpuiate an ni.
Inrinni I-League inkhel dangah champion hlui Aizawl FC chuan Rajiv Gandhi Stadium, Aizawla an mihual Churchill Brothers Goa lakah point hnih hloh thenin 1-1 draw an hlawhchhuak thei hram a; khelh 21-ah point 25 neiin table-ah pasarihna an luah.
Mualpuia goal hnih kan hmuh hi first half chhunga lut ve ve niin, minute 19-ah Anil Rama Goalkar chuan Churchill hma-hruaina thunin, minute li hnuah R. Lalthanmawia’n mualneitu team siphurh a sut a, goal dang luhbelh loin team pahnih an inhnehtawk.
I-League champion thar RoundGlass Punjab
![](https://theaizawlpost.org/wp-content/uploads/2023/03/pun.jpg)