Pete Samprass hun a liam chiah a, ka game ngainat berte zinga mi Tennis-ah tan tur ka nei lo chu a ni nghal mai bawk a. Lleyton Hewitt, Marat Safin leh Andy Roddick te khan Big Title han chawi ve zeuh zeuhin World No. 1-ah te han in vaw kai ve zuai zuai thin mahse min hneh zo tlat lo.
Thim thuah hnih!
Chu hun khawhar-thlak, ka tana tennis hun ‘thim’ ah chuan an Swiss pachal Roger Federer a rawn inlâr tehreng a, khatih laia kha pa tan loh kha a va vanduaithlakin a va hahthlak chiang-kuang ber mai em! |an tur nei bawk si lo, tan loh ber lah chu ‘Tuai zinga a nei lian ber’ ang hrimin a vawk lal len lurh lurh mai a, tennis court zawng zawng kha a pa ta emaw tih mai turin Nopui min chawi khum reng mai bawk nen. Thim thuah hnih chu ani ber lawm le!
Thim hnehtu vartian chu
Kei hian Roger Federer hi tan lo teh mah ila hepa hi chuan Tennis hi a thiam chiang a ni. A tumpui apiang ka tan a, hlim ni kawl a eng mawh ngang mai! Chutah le, Spanish thliarkar tereuhte Mallorca atangin vaivut chunga inkhel thiam ‘bik’ Rafael Nadal a rawn chhuak a, t khât tawkin palian Roger a rawn keuh tlu ve ta deuh dup dup mai. Thim thuah hnih hnuah Vartian hun kan thleng ta.
Mahse, he Spanish Star hi Vaivut (Clay) ah chuan magician ang maiin che tawih thin mahse Mi tam takin Tennis player piang tawh zinga thiam bera an sawi Roger Federer meuh bawh bet reng thei tur in a nghet (consistent) tawk tlat lo. Ball chak tak taka a thlawh fua fuana Hard Court leh Grass Court ah a dawih zawkah a tang leh ta fo mai. Ka tan thlawn fo a, Damna Kim ka chang thei lo.
Buaina ram ata ni eng mawi
Hmanah ti khanglang ang aw, Yugoslavia kha kan la hria em? Kha communist ram keh darh ta, dictator sual zet ‘The butcher of the balkans’ ti hiala an sawi Slobodan Milosevic-a’n rawng taka ro a relna ram ngei kha!
Hnam hrang hrang te inhuat rawnna hmun, inpawng nekna, buai leh tahna hmun, indona tualzawl atang ngei khan mak tak maiin êntu a lo chhuak tlat nia mawle! Ni e, he mi ropui Novak Djokovic hi Serbia ram tan mai eng ani lova Tennis khawvel tan amah hi eng a ni. I tan lo anih pawhin hepa hian tennis a thiam lo i ti anih chuan ‘Dawt’ I sawi a ni tawp mai.
A chawrchhuahna ram, a hnam, a mizia leh a hmel hmai avangin a elpui player ropui pahnih Roger leh Nadal te angin tantu ngah velo mahse he mihuaisen hi dan theih a ni lo. 2008 Australian Open atangin par a rawn chhuang tan a, kei ka hlim em em a, khawvelin hmuhnawm a ti bawk a. A tir lamah khan a hmaa mihuai kal hmasa pahnih Roger leh Nadal ropui vanglaia lo chhuak anih vangin anni pahnih khan a ropuina kawng an dal dawn emaw kan ti a, mahse eng court ah pawh a thiam chikim lulai em mai a, mi tam takin khawvela tennis player ropui ber tiin an sawi tawh ang.
Par rimrui an chuai thin!
Australian Open a chawi atangin kum 15 zet alo liam ta. A rilru pakhauh in, inkhelh te lah chu la thiam sateh mahse mihring ve tho a ni a, a tha in tlin chin a nei a, a kumin a nawr liam ve dawn hnai ta. Khawvel a la tawp lova, kan dam a, amah pawh a lam anih pawhin nakum bak hi Novak Djokovic inkhel kan hmuh hmel ta love. A pa meuhin 2024-a chawlh a beisei thu a sawi hian lung a ti leng lawk nghal ringawt nia. Ka mu thei ngut a nge maw chu le….!
Ka duh pa Nole.. i liam mai ang maw?
By : Puia Pachuau
I liam mai ang maw?
