I ngaihzawng kha i chhungten an ngaina lo tih hriat theih dan
Ngaihzawngte nen kan inkar a lo nghet telh telh a, kan chhungte pawhin an hriat hun a lo awm a, kan inkar a serious tan ta. I chhungten i ngaihzawng chu an duh ve ngei che i beisei a, i chhungte nen boruak tha tak nei se tih te pawh i duhthusam a ni. Mahse, duhthusam angin engkim hi a awm vek bik loh chang a awm thin. Tun tumah hian relationship lama mi thiam ten kan chhungten kan ngaihzawng chu min duhpui loh thu tawngkaa an sawi chhuak lo a nih pawh a an ngaina tehchiam lo tih hriat theih dan ni a an sawi te kan rawn tarlang e.
1. In chhungkuain eng emaw tihpui nikhua in neihin an sawm ve ngai lo. Pass lawm emaw, birthday lawm emaw, thil tihkhawm dang emaw pawh ni se ani chu i chhungten an sawm hmaih bik ziah a nih chuan an ngaina lo a, an duhpui lo che tih hriat mai tur a ni. Chhungkaw thil tihkhawmah i thiante an sawm tel ve a, i ngaihzawng ber an sawm ngai miah loh chuan an duhpui lo che tihna a ni. An sawm ve lohna chhan i zawh pawhin, “Kan chhung khat hnai a ni lo,” an ti mai ang.
2. A chungchang in sawichhuah nikhuain i chhungten ani chu i thian angin an sawi mai ang a, a nih loh pawhin ‘ani kha’ tiin an sawi mai ang. Direct takin a chanchin an sawi vak lo ang a, a hming pawh an lam ri ngai vak lo ang. A chanchin pawh an zawt vak ngai lo ang che. Eng emaw changa sawichhuah ve a nih pawhin ani chanchin chu an nem liam thuai thuai ang a, engmah an sawi thui duh ngai lo ang.
3. Ani chu pawnlam mi ang deuhin an en ang. A lo awm ve emaw, an sawm ve hlauh emaw a nih pawhin titi-na leh thil sawi khawm velnaah an telh ve lo ang a, a ngaihdan phei chu an la ngai lo ang. Tuman biak lumlam teh vak an tum lo ang a, midangho hlim taka an titi mawlh mawlh laiin ani chu khawi lai kil khatah emaw a lo thu ngawi ve mai mai ang.
4. Ani chu i ngaihzawng hluite nen an khaikhin fo ang. I ngaihzawng chu i chhungten a hriat lohin i chhungten i ngaihzawng hlui nen an khaikhin fo a nih chuan an duhpui lo che a, an ngaina lo tihna a ni mai. A chang chuan a awm ve reng lai pawhin i ngaihzawng hlui te hming sawi chhuakin, fel an tih thu te pawh an sawi chhuak hial ang.
5. A chanchin chhe lam sawi vak an hreh ve ang a, an duh loh thu sawi vak pawh nuam tih loh chin an nei ve ang, mahse, chutiang hunah chuan a chhungte chanchin an sawi daih ang. A chhungte chanchin chhe lam an sawi thin ang. Tin, i ngaihzawng chu a awm ve lai pawhin a chhungte chanchin chhe lam sawipui an ching ang, chu chu an ngaina lo tih lantirna a ni.
6. A bula i awm tam theih loh nan an veng deuh ang che. Hetiangah hi chuan an duh lohna chu midang tan pawha hriat theih khawpin an tilang tawh ang.
I ngaihzawng kha i chhungten an ngaina lo tih hriat theih dan
