Heartburn an tia, keinin thin-thip kan ti mai a. Pumah thur a tam (acidity) vang a niang tiin kan ngaihthah mai thin a, antacid te an an ei ve mai bawk thin a. A nawm loh dan chu han tawrh theih loh khawp a ni lem lo bawk a, kan ngaihthah ve mai thin. A rei deuh hnuah pawh mahni kan inhnem chawp a, chaw ei tlem deuh tawh ila, kan tih loh leh thil thak lam chi ei tawh lo ang, te kan ti a.
Mahse, a tak takah chuan ‘acidity’ vang ringawt a lo ni thin lo, eng emaw thil serious zawk rawn intham vek a ni duh khawp mai. Thin-thip, pum puar nuam lo, ti deuh ûl leh pum lam nuam lo deuh teuh teuh te hi thil common ang reng tak chu a ni ngei mai a, chutihrualin thil serious zawk rawn intham vel vang a ni ve thei tlat mai a, ngaihthah mai loh tur a ni.
Max Super Speciality Hospital-a mithiamin hetiang pum lam nuam lo deuh teuh teuh leh thin-thip chungchanga hriattur pawimawh a sawi, Times of India-in an tarlan te kan rawn chhuah chhawng e.
Acid reflux, indigestion, kawpuar, awmbawr nuam lo deuh teuh teuh, luak chhuak tideuh nghulh, pum puar rit deuh nulh te hi kan neih fo hnuah pawh kan ngaihthah a, mahni tawka damdawi inchawhin, antacid te kan ei ve leh ngawt thin a. Kan ei leh in vangah kan puh deuh ber thin.
Acidity leh indigestion te hi thildang serious zawk vanga rawn awm te a ni thei a, heartburn (thinthip) leh indigestion te hi pumpui cancer symptom te a ni thei. Pumpui cancer hian a intan tir lamah symptom a nei em em lo tlangpui a, a rawn lan chhuah dan tlanglawn tak chu indigestion (pum chunglam nuam lo, a symptom-ah chuan thinthip, pum puar deuh ûl, luak chhuak, chawi ei tam thei lo puar deuh nghal ul zel) a ni duh hle. Chutihrualin hetiang symptom nei zawng zawng hi an cancer vek e tihna a ni chuang lo a, gastric ulcer/ diurnal ulcer vang te pawh a ni duh khawp mai.
Amaherawhchu pumpui cancer hian hetiang symptom hi a neih ve theih avangin mahni inhriatchian vat a tha a, cancer reng reng chu hriatchhuah hmaa, inenkawl hma hian a damna chance a sang zel a ni.
Acid reflux leh indigestion symptom hi a tam zawkah chuan chhan dang eng emaw vang a ni deuh hle a, entirnan gastritis, peptic ulcer, gall bladder disease leh case thenkhatah chuan lunglam natna (cardiovascular disease) vang te pawh a ni thei.
Kan tunlai nunphung leh kan thil chin tha lo avangin heng symptom te hi a neih theih bawk a, zan mut that loh te, rilru hah leh vei ngah lutuk vangte leh a chang chuan kan lifestyle thlak thut avang te pawhin reflux disease ni neih theih a ni bawk.
Engpawh nise, pum lam nuam lo hi kan nei fo a nih chuan ngaihthah mai loh tur a ni a, heng symptom acidity emaw indigestion emaw te hi kan nei ngun viau a, zan mut te a tibuai a, kan nitin nunphung te a nghawng chuan damdawi lam thiam te rawn thuai tur a ni.
I thin thip ngaihthah suh
