IAF hnenah airport hlan kan tum lo
– Adviser to CM
Indian Air Force kutah sawrkarin Lengpui Airport hlan a tum loa, IAF kaltlangin changtlung zawka siam theih dan an dap mek zawk tih adviser to chief minister TBC Lalvenchhunga chuan a sawi.
Lengpui Airport kalpui zel dan tura sawrkarin Working Committee a dina chairman TBC Lalvenchhunga, MLA hian Thawhtannia ZPM office-a inkhawmah Mizoram sawrkarin IAF kutah airport a pe dawn loa, kan ramin a hlawkpui theihna tur leh changtlung zawka siam an tum mai a ni tih a sawi. Lengpui Airport chu naktuka hlan mai tur niawm takin mi rilruah a awm deuh nia a hriat thu sawiin, mithiam tak takte nen an zirchiang a, Wing Comdr J Lalhmingliana chu an zirchianna an thawn hmasak ber a ni tih a sawi.
“Min lo chhanna chu, airport kan enkawl zawh loh thu leh AAI-in a dratf an neih ang chu IAF atangin nei ve phawt turin thurawn min pe a. A thurawn anga kan kal mek laiin, a ni lo zawngin media hrang hrangah min sawi ta a, wing commander senior dangte leh service lai mekte pawh kan rawn nasa a ni. IAF kuta airport hlan duh lotute hian kum 2011-ah ram acre 32 zet jet fighter thuhrukna tur an lo pe tawh a. Kum 2022-ah AAI-in Mizoram sawrkar-ah MoU draft a rawn thawn a, khatihlaia sawrkar MNF-in a tihpuitlin hmain sawrkar a inthlak zui ta mai zawk a ni,” a ti.
ZPM sawrkar hmalakna a nih bik loh thu leh party pahnih sawrkar tawhte hma lo lak tawhna an bawhzui mai a nih thu adviser to CM hian sawiin, “Airport hi hralh kan tum loa, hlan kan tum hek lo. IAF kaltlangin changtlung zawka siam theih dan kan dap a ni. State danga mipuiin IAF airport an va tawm zawk ang kha niloin Lengpuiah chuan kan airport min rawn tawm ve zawk dawn tihna a ni ber. Kum 2019 leh 2022 khan IAF hnenah Lengpuiah acre 97-a zau leh Sihphirah acre 5-a zau MNF sawrkar khan ‘no objection’ a lo pe vek tawh a, tun dinhmunah a hlau ber anga an rawn au leh si,” a ti.
CM adviser hian ram siamthat an tumna kawngah huai takin administrative reform an kalpui mek a, hun reilote chhunga an hnathawh avangin sawrkar laipui atangin beisei phak loh sum tam tak an dawng tan mek niin a sawi. “ZPM sawrkar chuan Year of Consolidation kan puang a, austerity measure kan la bawk a, department hrang hrang sum hman dan budget kan present dawn a, a rawn lang dawn a ni,” a ti.
IAF hnenah airport hlan kan tum lo – Adviser to CM
