Thawhtanni zana Central YMA Executive Committee thukhawm chuan sawrkarin midang kuta Lengpui Airport hlan a tum chungchang a ngaihtuah a. 2024 August 9-a NGO Coordination Committee-in Indian Air Force (IAF) kuta Mizote rohlu Lengpui Airport hlan a remtih loh thu a lo puan tawh chu an dinna ngai ala ni reng tih sawiin, ‘Kan ram leh hnam rohlu Lengpui Airport hi IAF kuta hlan kan remti ngai dawn lo,’ a ti.
Hemi chungchangah hian Mizoram sawrkar pawh, Mizo ram leh hnam tana tha ber tur thlir chunga ngaihtuahna hmang nawn turin an ngen tih a sawi a ni.
Thawhtanni khan NGO Coordination Committee leh Lengpui Airport zirchiangtu Working Committee bakah GAD hnuaia Civil Aviation hotute chuan airport chungchang hi an sawiho tawh bawk a. Hetah hian sawrkar lam aiawhte chuan IAF kuta airport hlan a tul chhan lam an sawi ber nia sawi a ni a. NGOCC lamin an dinna ngaia an la din thu an sawi ve thung a, sawrkar lamin an rilru hmin a tumna erawh an hriatthiam sak thu sawiin, boruak tha takin sawiho a ni tih thu dawn a ni.
IAF kut Lengpui Airport hlan duh lotu Lengpui Airport Forum din a ni tawh a. An ni hian thuthar thehdarhtute kaltlang IAF kuta airport hlan an duh loh chhan leh a nghawng theite booklet siam meuhin an sawi a, a tul angin hma an la zui mek a ni.
Midang kuta airport hlan chungchang hi social media lamah pawh khel hlawh ber pawl a la ni reng a. Sawitu tam zawk chuan IAF kutah kher airport hlan an duh loh thu an aupui a, political party inbeihnaah a chang chho mek zel a ni.
Hetihlai hian Mizoram sawrkar chuan cabinet-ah meuh pass in, IAF kuta Lengpui Airport hlan a lo remti tawh a. Tunah hian draft memorandum of agreement buaipui mek niin, an peihfel thawhkhat tawh nia thu dawn a ni.
IAF kuta Airport hlan loh kha kan dinna ngai a la ni reng
