IAF ram lei dan chhui chak
turin sawrkarin nawr dawn
Indian Air Force-in Lengpui-a ram an lei dan chu rang taka chhuichuah a nih theihnan State Legislative Assembly chuan CBI nawr turin Mizoram sawrkar a ti.
Zirtawpnia Assembly Session-ah speaker remtihna in private member’s resolution a lut a. MNF member Dr R Lalthangliana putluh – “Indian Air Force (IAF) in Lengpui ram an lei dan chungchangah dan bawhchhiatna nasa tak leh corruption a awm ngei nia lang hi Mizoram mipui duh dan leh beisei ang ngeiin Central Bureau of Investigation (CBI) in an chhui chhuah thuai theihnan Mizoram sawrkarin rang taka bawhzuiin hma la nghal rawh se,” tih a ni.
Hei hi sawiho tura chhawpchhuah a ni a. Speaker sawm angin House leader, chief minister Lalduhoma’n state sawrkar hmalak tawh chin a sawi a. CBI chhui tura ‘consent’ an pek tawh thu a sawi. Resolution puluttu Dr R Lalthangliana leh MNF member-ten he thilah hian ZPM kaihhruai sawrkar chu dan dikloa thil tihnaah a inrawlh ngei nia an hriat dan an sawi a. ZPM member lamin MNF sawrkar laia thil lo tihfel tawh, loh theih loha bawhzuia a nih mai dan an sawi ve thung. INC leh BJP member-ten he thila MNF leh ZPM member inpuhtawnna chu a tu ve ve mah rilru inhneh theihna a ni tawh loa, resolution chu pawm mai a, CBI kuta hlan a tul zia an sawi ve bawk.
Speaker chuan member sawitu zawng zawngin resolution dodal zawngin an sawi loa, chutihrualin a thu phuah dan siamrem hret ngai awm nia a hriat thu a sawi chu member-te a rawn a. “Indian Air Force-in Lengpui ram an lei dan chungchangah dan bawhchhiatna nasa tak leh corruption a awm ngei nia lang hi Mizoram mipui duh dan leh beisei ang ngeiin CBI-in a chhui chhuah thuai theihnan Mizoram sawrkarin rang taka bawhzuiin chak takin hma la rawh se,” tia siamremin pass a ni.
IAF ram lei dan chhui chak turin sawrkarin nawr dawn
