ILP dil anga awm lo thawnhaw mek
Inner line permit an dil anga awm lo dapchhuakin an thawn haw mek tih chief minister Lalduhoma chuan a sawi.
Nilainia Assembly Session-ah chief minister hian, ILP guideline hi a hun lai mil zela siamthat a ngai a, tunah pawh ennawn mek niin, online-a tih tura buatsaih a ni a, an permit-in a phal chin bak aia rei awm an awm a nih chuan manchhuah zung zung theih a ni tawh dawn tih a sawi.
“Permit nei loa lo lut leh permit-in a phal aia rei awm an tam hle niin a lang a, mi firfiakte zalen taka an rawn awm theihna kan nih mai a hlauhawm tan tawh. Prime minister leh Union Home minister bakah National Security adviser leh Intelligence Bureau director ka sawipui a, Home secretary leh larsap pawh ka sawipui bawk,” a ti.
Sawrkar laipui hotute a lo thawt lawk ang hian, dan loa lo lut leh an permit a tawp hnua la awm khawtlaite dapchhuah runpui an nei mek a. Khawlaia va vai ngawt a tawk loin an hria a, tlangzarh hluai loin Aizawlah chuan local council wise-in an kalpui a, local council leh tlawmngai pawlte nen hetiang mi hi engzah nge an neih a, tu in nge an luah, tih an hre vek. Dapchhuah a, a tul anga haw tir hna an bei mek, a hmatiam zela tih an tum tih chief minister hian a sawi.
“Hengah hian dan ang thlip thlepa magistrate hnena hruaia tih kual pawh a tul em em lo. Hetiang mi chu haw tir a, mahni veng theuh kan then thiainghlim kha a tha mai,” a ti.
Assam sawrkarin foreigner dapchhuah beihpui a thlak avangin Home minister hoin police-ten ramri hrul ven hna ngawrh takin an thawk a, Mizram chu a la himin an hria tih chief minister hian a sawi bawk
ILP dil anga awm lo thawnhaw mek
