Tunhnai khan Mizoram Police leh Central YMA thawkdunin ILP an endik a, ILP fel lo 1141 hmuhchhuah a ni a. Aizawl district-ah manchhuah hi an tam ber a, 1019 manchhuah niin, district danga ILP fel lo manchhuah belhkhawm chu 122 a ni bawk.
ILP fel lo heti zat man chhuah tur an la awm fo thei hi thil mak tak a ni. A fel loh dan hi a enga pawh chu lo ni se, a fel loh theih chhan lamah hian inenfiah kan ngai hle tihna a ni.
ILP diltute hian sponsor (sponsor-tu) an nei vek a, Dan hnuaiah sponsor tihtur leh ILP holder tihtur a awm a. ILP Sponsor chuan mawhphurhna laa state dang atanga hnamdang a koh luhte chinchang hi a hre zui zel tur a ni a, permit renew a tul hunah emaw, ILP holder chuan a trade anga a thawhna area sawn a duh hunah emaw, thuneitute hnenah an thlen tur a ni. Thuneitute hnena engmah thlen si lova anmahni duhthua an hnathawhna tur area chhuahsana hmun danga hnathawh hi phal a ni lova. Construction work ti tura Cement mistiri anga inchhal thenkhat, kawngsira nepnwi zuara lo awm ta daihte pawh an awm thin. Mistiri helper trade nei zingah, khawlaia lapaw chini lo zuar ta lawp lawp te pawh an awm thin bawk. Hengte pawh hi ILP fel lo zinga chhiar tel theih vek a ni.
Hetianga dan bawhchhia ILP holder tam tak manchhuah tur an awm reng thei hi, kan dan neihte kan kenkawh that loh vang emaw, kan dan (system) a fel tawk loh vang emaw a ni mai a. System fel tak siam pawh ni se, a system anga kan kalpui leh theih si loh chuan dan bawhchhiat theihna remchang (loopholes) hi a awm reng dawn tihna a ni.
ILP chungchangah hian sponsor, khawtlang leh sawrkar thawhhona tha tak neih kan mamawh a ni.
ILP fel lo 1141…
![](https://theaizawlpost.org/wp-content/uploads/tap_logo-min-large.jpg)