Session kal mekah, ziaka chhan chi, Aizawl West III bialtu VL Zaithanzama zawhna, GAD changtu Lalduhoma, chief minister-in a chhan dan chuan 2024 khan mi 1,29,953 hnenah Temporary ILP pek a ni.
Zawhna chhannaa a lan danin, 2024-a Temporary ILP mi 1,29,953 hnena pek hi, renew an awm lo a. Mi 238 hnenah Temporary Stay ILP pek a ni a, renew an awm lo. Mi 7927 hnenah Regular ILP pek a ni a, mi 5675-in an renew. Mi 18 hnenah 2 Years ILP pek a ni a, renew an awm lo.
ILP hi chi hnih, Temporary leh Regular a awm a. Temporary ILP hi ni 15 chhung dam a ni a, Regular ILP hi thla 6 chhung dam a ni.
Chuti a nih chuan, kum 2024 chhunga Temporary ILP pek chhuah dan hi, chawhrualin thla tin mi 10,829 hnenah, leh ni tin mi 360 hnenah pek a ni.
ILP hi min lo awptu hmasa ten, hnam tlemte, chimral tham lek kan nih avanga min hung bikna tura dan an lo siam, India sawrkar hnuaia kan awm hnu pawha kan chhawm tak zel kha a ni. He hung bikna dan tha tak hi lo nei lo ila chuan, tuna kan thenawm state thenkhat dinhmun ang hi kan dinhmun tur a nih a rinawm.
Mahse, kan inhumhimna tura dan tha tak kan hman mek hi, tuna zawhna leh chhanna hlimthla atanga han thlir khi chuan, ILP hmanga inchimralnaah kan chhuah mai ang tih a hlauhawm ta hle.
Kum tin khitiang zat ILP holder Mizorama an awm belh zel chuan, min la chimral tho maiin a rinawm hial a ni.
ILP pekchhuah danah hian kan fimkhur telh telh a pawimawh ta hle. Tuna data kan neih ang hi chuan, ILP nei hnamdang mi 360 hi ni tina lo lut an ni a, awlsam zawka online hmanga ILP pekchhuah dan kan buaipui ang tho hian, kan ram chhunga ILP holder-te dinhmun englai pawha hriat zung zung theihna lam pawh hi kan buaipui a ngai. Chuti a nih loh chuan, ILP check run pui kan ti reng ang a, tha leh zung, hun leh tha, sum leh pai kan seng thlawn reng mai dawn tihna a ni bawk awm e.
ILP pek chhuah chhiarkawp
