Lung in tang mek Pakistan prime minister hlui Imran Khan chuan February 8 a inthlanpui awm turah party tin te inang tlanga campaign an neih theih ngiatin chutiang a nih loha inthlana felfai lo taka thil kalpui a nih chuan Pakistan chuan ngelnghehlohna leh buaina nasa zawk a hmachhawn ang a ti.
Kum 71-a upa Khan Pakistan Tehreek-e-Indaf (PTI) party dintu chuan a tanna Adiala Jail ah media mite nena inkawmna an nei a.
Circketer nia politician a inlet ta chuan PTI chuan election campaign an neihnaah pawh harsatna an tawh thu sawiin an party chuan vantlang inkhawm an neih tur pawh khuahkhirhsak zel an ni, a ti a.
PTI candidate-te chu vau leh manin an awm tia sawi bawkin chu chu inthlana an chuh loh nana hmalakna a ni a, inthlanna fair taka kalpui a nih loh chuan Pakistan chuan ngelnghehlohna leh buaina nasa zawk a tawng thei tiin a sawi a.
Khan chuan sorkar lai chuan an party chu an chhu chhe thei lo, a chhan chu a inphun nghet lutuk tiin a sawi bawk a. Hei bakah hian an party phatsan tum an awm chuan vau bawkin PTI an chhuahsan a nih chuan an politics a tawp ang a ti bawk.
Khan chuan Election Commission of Pakistan (ECP) chuan PTI tena an electoral symbol an hman theih loh nan dan a tum char char tiin a sawi bawk a. Pakistan Supreme Court pawhin January 13 khan PTI symbol ‘bat’ chu paihsakin hei vang hian party atanga in-candidate tur te chu independent candidate anga an awm a ngai dawn bawk.
Nawaz Sharif chungchang pawh sawiin PTI founder chuan Pakistan hruai tura Nawax Sharif dah tumna a awm a nih chuan ram tlanchhiatsan dah a ni dawn tihna a ni a, Pakistan tawrhna a nasa hle dawn a ni tiin a sawi bawk.
Khan chuan Sharif chuan Layyah ah rally a neih tum pawh mi leh sa an neih tlem lutuk avangin a thulh a ti bawk a. Inthlan hma lawka chhuah zalen a nih chauh pawhin PTI chuan rally turu ber an nei thei ang a ti bawk a.
“Inthlan hma ni thum lekah pawh min chhuah zalen se la, public rally tum khat lek ka neih remti se la, eng nge kan tih theih an hmu mai ang,” tiin a sawi bawk.
Imran Khan-an buaina nasa zel ang ti
