Imran Khan thiamloh chantirin awm

Ex-Pakistan Prime Minister Imran Khan chuan eiruk thubuaia thiamloh chantir a nih hnua kum thum lung in tang tura a chungthu rel a nih hnuah ram pum huapa lungawilohna lantir turin ngenna a siam.
Imran Khan hi office a luah laia thilpek a dawn hralhin sum te sawi lang lova puh avanga thiamloh chantir a ni a. Amah thiam loh chantirna chu appeal a nih tur thu a sawi bawk a.
Court-in thutlukna a siam hnuah Imran Khan chu a chenna Lahore atangin man zui nghal a ni a.
Court-in thulukna a siam hnuah video tichhuakin chutah chuan amah thlawptute chu court thutlukna chu bei let turin a ngen a.
“Ngenna pakhat chauh ka nei, inah thu ngawi reng suh u” tiin X, a hmaa Twitter tia hriat larah video a tihchhuahah a sawi a. “In tan leh ram leh in fate hma lam hun atana beitu ka ni,” tiin a sawi bawk.
Cricketer hlui politician-a inlet ta kum 70-a upa ni tawh Imran Khan hi kum 2018 khan tlan tlin niin mahse nikum khan Pakistan-a thiltithei em em sipaite nena inhmuhthiamlohna an neih hnuah no-confidence hmanga a sorkar paihthlakin a awm a ni.
Thuneihna a chan loh hnuah Imran Khan hian thubuai 100 chuang neiin hengte hi politics lama amah tihchhiat tumna vek tiin a sawi a.
Amah puhna ber chu office a luah laiin foreign dignitaries te hnen atangin thil pek a dawn leh chung hralhna te atanga hlawkna awm chu dik lo takin a tarlang tih a ni a. A thil pek dawn hlut lam chu 140 million Pakistani rupees vel niin chung zingah chuan Rolex watches, ring leh cuff link te pawh a tel tih a ni.
“A rinawmloh zia chu phat rual loha laihlanin a awm” tiin Judge Humayun Dilawar chuan ruling a neihnaah ziak lang a. Court pawn lamah pro-government lam pungkhawmte chuan ‘I show a tawp ta Khan’ tiin an aurual thung.
Judge Dilawar chuan police te chu Khan man nghal turin a ti bawk a. Court thutlukna siam atanga minute 15 chhung lekin social media hrang hrangah police car leh truck tena Imran Khan phura an kalpui lai tihlanin a awm nghal a ni.
Imran Khan lawyer Intazar Hussain Punjutha chuan trial chu kangaroo-type court” anga neih a ni tia sawiin ‘puha awm chu insawifiah tura hun pekin a awm miah lo’ a ti bawk a.
“Vawiina court thutlukna avangin kum nga chhung politics a khelh phalsak loh nghal a ni,” tiin Panjutha chuan a sawi bawk a.
“Mahse a amah hremna chu tihkhawtlai emaw a nih chuan chu chu court sang zawkin a remtih pawh kan ring a, politics khel thei turin a lo let leh ang,” tiin a sawi bawk.
Khan chu Adyalal jail-ah dah nghal niin hei hi Isalambad chhim lama Rawalpndi khawpuia central prison a ni.
Thla tam tak chhung Imran Khan hi man theih lohin a awm a, a chang chuan amah thlawptute chu police te nen an inbei hial thin bawk a.
May thla khan Khan chu court thupek anga a inlan duh loh avanga man niin mahse amah man chu dan kalh tia sawi a nih hnuah chhuah zalen leh nghal a ni a. Man a nih hnuhnun ber 9 May khan Pakistan ram pumah lungawilohna lantirin a awm phah tawh a ni.
Khata tang khan Imran Khan leh a politial party te chu sorkarin nasa taka vaiin senior leader tam tak ten man an tawk a, a hnuah chung senior leader tam tak te chuan Imran Khan party chu an chhuahsan thu an sawi zui tlangpui bawk.
Amah thlawptu sang chuang man niin chung mite chu military court-ah an chungthu ngaihtuah a ni dawn tia sawi a ni bawk.
Imran Khan chuan Pakistan army te chuan a party chu an hlau tia sawiin inthlan awm se chuan a party chuan chakna an chang dawn tih an chiang si a, hei vang hian democracy chu an namnul zui ta a ni tiin a sawi.
Pakistan army te hian politics ah inrawlhna thuk tak neiin a changin sorkar an paihthla a, a changin a phenah an awm bawk a. Mahse, anlaysts te chuan kum 2018 a Imran Khan an inthlana chakna a chan pawh kha army te puih vang a ni tho an ti.
Opposition a nih hnuah Imran Khan chu Pakistan army te sawiseltu langsar ber ni zui zelin hei vang hian Pakistan army te larna chu a tlahniam em em an ti bawk a. A sorkar paihthlak a nih hnuah Imran Khan chuan a rang thei ang bera inthlanpui neih a ngiat zui bawk.
August 9 ah Pakistan parliament chu thiah ni dawnin inthlan thlengin sorkar enkawltu tur lailawk dah a ni ang. Inthlan hun tur puan a la ni lo va, constitution ang chuan November thlaah neih hman tur a ni thung.
Mahse, kar kalta Inrinni khan Pakistan law minister chuan census thar peih fel a nih hnuah chauh inthlanna neih a ni ang tiin a sawi thung a.
Azam Nazeer Tarar chuan Geo news TV hnenah census neih fel nan thla li tal hun mamawh a ni dawn tia sawiin hei vang hian inthlan chu thla tam takin pawh khawtlai a nih rin a ni thung.